Qostanaı oblysynda 16 myń jumys orny ashylmaq
QOSTANAI. QazAqparat – Bıyl Qostanaı oblysynda «Eńbek» baǵdarlamasyna bólinetin qarjy kólemi ósti. Bul týraly Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenova baıandap berdi, dep habarlaıdy QazAqparat.
2020 jyly «Eńbek» baǵdarlamasy sheńberinde shaǵyn nesıe berýge bólingen qarajattyń jalpy somasy 8,4 mlrd teńgeni quraıdy. Barlyǵy 526 jobaǵa qoldaý kórsetiledi. Bul jospardy Eńbek jáne halyqty áleýmettik qorǵaý mınıstrligi bekitken.
«Óńirde shaǵyn jáne orta bıznestiń damýy men oǵan kórsetiletin qoldaý kólemi artty. Byltyr atalmysh baǵdarlama boıynsha oblysta 7,6 mlrd teńge ıgerilgen. Qarjylyq kómekten tys osy jyly kópbalaly analardy kásipke tartý kózdelip otyr. Buǵan deıin kóp balaly otbasylar men az qamtylǵan otbasy múshelerine beriletin jeńildetilgen nesıe merzimi 5 jyl bolyp kelse, bıyldan bastap bul 7 jylǵa deıin uzardy. Osy sanataǵy azamattar 4% ósimpulmen 21 mln teńgege deıin jeńildetilgen nesıe ala alady. «Bastaý Bıznes» jobasy boıynsha oqyp shyqqan kópbalaly nemese az qamtylǵan otbasy múshelerine olar ári qaraı kásibin dóńgeletip áketkenshe, 18 aıǵa deıin baqylaýda bolyp, demeý kórsetiledi. Mınıstrlik bekitken aldyn ala josparǵa sáıkes 2020 jyly oblysta 16 myń jumys orny ashylady», - dedi basqarma basshysy oblys ákimdiginde ótken apparat májilisinde.
«Eńbek» baǵdarlamasyna qatysty taǵy bir jańalyq, bıyldan bastap naryqta suranysqa ıe mamandyqtardy oqytý úshin azamattarǵa maqsatty vaýcher usyný qarastyrylǵan. Bul qundy qaǵaz talapkerlerge ózi bilim alǵysy keletin oqý oshaǵyn, bilim mazmuny men merzimin tańdaýǵa múmkindik beredi. Sondaı-aq, bilim alýǵa, shákirtaqyǵa, materıaldyq kómekke, adamnyń júris-turysy men jatyn-ornyna, tipti medıtsınalyq tekserýden ótýine deıin jumsalatyn shyǵynnyń barlyǵyn vaýcher kóterip alady.
Byltyr bıznes ıdeıasyn iske asyrýǵa yntaly 3140 adam «Bastaý bıznes» pen «Jas kásipker» jobasy aıasynda kásipkerliktiń álippesin meńgerdi. 2019 jyly shaǵyn jáne orta kásipkerlik nesıelendirýge 3 mlrd tenge bólinse, onyń 2 mlrd 700 mln teńgesi aýyldarǵa qarastyrylǵan. Bıznes jobalardyń basym bóligi aýylda mal sharýashylyǵyn damytýǵa baǵyttalǵan.
