Qostanaı oblysynda 159 aýyl derbes bıýdjetke kóshti
QOSTANAI. QazAqparat – Qostanaı oblysynda turǵyndar sany 2 myńnan asatyn 150-den astam aýyl jergilikti ózin-ózi basqarýdyń derbes bıýdjetine kóshirildi, dep habarlaıdy QazAqparat.
Oblys ákimdiginde ótken apparat jıynynda oblystyq Qazynashylyq departamentiniń byltyrǵy jumysy qorytyndylandy. Departament basshysy Erlan Oshaqbaevtyń aıtýynsha, 2018 jyldyń 1 qańtarynan bastap Qostanaı oblysynda turǵyndar sany 2 myńnan asatyn 45 aýyldyq okrýg jergilikti ózin-ózi basqarýdyń derbes bıýdjetine kóshken.
«Bıyl osyndaı 159 aýyldyq aýyl derbes basqarý deńgeıine aýysty. Jergilikti ózin-ózi basqarýdyń derbes bıýdjetin engizý aýyldyq okrýgterdiń qarjylyq múmkindikterin keńeıtýge múmkindik berdi. Qazir derbes bıýdjetke kóshirilýdiń ekinshi kezeńine jospar bekitilýde», - dedi Erlan Oshaqbaev.
Aýyldyq okrýgterdi ońtaılandyrý olardyń qyzmet tıimdiligin arttyrý maqsatynda bıýdjettiń derbes deńgeıine kóshýdi alǵashqy bolyp Qarasý aýdanynyń ákimdigi bastady. Bul ońtaılandyrý aýyldyq okrýgterdiń sanyn 19-dan 13-ke deıin azaıtýǵa, kadrlardyń sapalyq quramyn jaqsartýǵa, aýyl jáne aýyldyq okrýgterdiń mamandary arasyndaǵy júktemeni sáıkestendirýge múmkindik berdi.
Búginde oblystyq Qazynashylyq departamentiniń qalalar men aýdandardaǵy basqarmalarynda 889 memlekettik, 204 memlekettik ózin-ózi basqarý mekemesi, 12 kvazımemlekettik, 13 memlekettik satyp alý sýbekti qyzmet alady. Aıyna orta eseppen 65 myń tólem eksheýden ótedi.
«2019 jyly «Qazynashylyq-klıent» aqparattyq júıesinde 871,9 myńnyń ústinde qujat qabyldansa, sonyń 25,1 myńnan astamy oryndalmastan keri qaıtaryldy. Olardyń kóbi aýyl sharýashylyǵy jáne jer qatynastary, bilim, polıtsııa salalaryna tıesili», - deıdi departament basshysy.
Aýdan-qalalar arasynda Jitiqara, Arqalyq, Qostanaı, Naýyrzym, Qarabalyq aýdandarynyń qujattarynda kemshilikter bar. Oblys ákimi atalǵan aýdandardyń ákimderine olqylyqtardy durystaýdy tapsyrdy.
