Qostanaı oblysynda 155 qoqys polıgony joıyldy
QOSTANAI. QazAqparat – Qostanaı oblysynda 313 zańsyz qoqys polıgony bar. Bul týraly «Qostanai — adaldyq alany» jobalyq keńsesiniń onlaın konferentsııasynda málim etildi, dep habarlaıdy QazAqparat tilshisi.
Jaqynda «Ǵarysh Sapary» UK AQ jerseriktik júıesi arqyly Qostanaı oblysynda qoqys qaldyqtaryn ruqsatsyz ornalastyrǵan 313 ýchaske anyqtaldy. Qazirgi ýaqytta onyń 155 alqaby joıyldy. Qalǵan 158 qoqys polıgonyn joıý týraly jergilikti atqarýshy organdarǵa tapsyrma berildi. Sondaı-aq qoqys alqaptaryn tıimsiz uıymdastyrǵan 26 aýyldyq okrýgtiń ákimderi ákimshilik jaýapkershilikke tartyldy.
«Taıaýda óńirlik Ekologııalyq retteý bóliminiń basshysy qamaýǵa alyndy. Ol qorshaǵan ortany qorǵaý salasyndaǵy zańnamalardy óreskel buzyp, qoqys qaldyqtaryn shyǵarý jobalary boıynsha birneshe ret para aldy degen kúdikke ilindi. Barlyqtaryńyzdy sybaılas jemqorlyq táýekelderin boldyrmaýǵa shaqyramyn. Qoqys alańy kimge tıesili? Mine, jaýapty adam da sol! Aýmaqtaǵy uıymdarmen jáne jeke tulǵalarmen turaqty negizde túsinik jumystaryn júrgizý qajet. Qoqys polıgonyn durys uıymdastyrý baǵytyndaǵy jumystardy ákimderdiń reıtıngine qosýǵa bolady», - dedi jıyn barysynda Oblystyq sybaılas jemqorlyqqa qarsy kúres qyzmetiniń birinshi orynbasary Danııar Smaǵulov.
Aımaqta qorshaǵan ortaǵa jaǵdaılaryn baqylaý úshin arnaıy saraptamalyq komıssııa qurylǵan. Mamandar qoqys polıgondarynyń zańsyz paıda bolýyna jol bermeýge jaýapty. Olar toqsan saıyn reıd sharalaryn uıymdastyrady.
