Qostanaı oblysynda 147 synyp karantınge jabylǵan
QOSTANAI. QazAqparat – Qostanaı oblystyq Sanıtarlyq-epıdemıologııalyq qadaǵalaý departamentinde oblystaǵy mektep oqýshylary men stýdentter arasynda KVI shaldyǵý máselesi qozǵaldy, dep habarlaıdy QazAqparat.
«Aǵymdaǵy jyldyń 1 qyrkúıeginen bastap 8 qazanǵa deıin bilim mekemelerinde koronavırýs ınfektsııasyna shaldyqqandar sany mynadaı: 572 oqýshy, oflaın rejıminde bilim alyp júrgen 350 oqýshy, JOO men kolledjde oqyp júrgen 98 stýdent. Aýrýǵa shaldyqqan 222 oqýshy nemese 38,8% oqý jyly bastalmaı turyp ınfektsııa juqtyrǵan», - dep habarlady departamentten.
135 mektepte KVI shaldyǵý oqıǵalary tirkeldi, aýrý juqtyrý kórsetkishi 27,4% qurady. 297 synyp karantınge jabyldy. Qazirgi kezde 147 synyp karantınde.
KVI juqtyrǵan oqýshylardyń eń kóp bóligi Qostanaıda anyqtalǵan, sondaı-aq Rýdnyı, Lısakov, Jitiqara, B.Maılın atyndaǵy aýdan, Áýlıekól, Altynsarın, Denısov, Meńdiqara, Qarabalyq aýdandarynda da tirkelýde.
Stýdentterge keletin bolsaq, qyrkúıekten bastap JOO, arnaıy orta bilim oryndarynda vırýs juqtyrýdyń 98 oqıǵasy tirkelip, 69 top karantınge jabyldy.
