Qostanaı oblysynda 143 jeke úıdiń qurylysy aıaqtaldy
QOSTANAI. QazAqparat – Qostanaı oblysy ákimi Arhımed Muhambetov halyqqa esep berý jıyny barysynda aımaqtaǵy turǵyn úı qurylysy týraly baıandady, dep habarlaıdy QazAqparat.
Aımaq basshysynyń aıtýynsha, 2019 jyly óńirde jalpy 335,4 myń sharshy metr turǵyn úı paıdalanýǵa berilgen. Bıyl osy salada ósim 10 paıyzǵa ulǵaıady.
«Byltyr jalǵa beriletin 5 turǵyn úı paıdalanýǵa berildi, olardyń ekeýi Qostanaı qalasyndaǵy «ıÝbıleınyı» shaǵyn aýdanynda jáne Qobylandy batyr kóshesi boıynda ornalasqan. Amangeldi aýdanynda, Arqalyq jáne Rýdnyı qalalarynda da jas mamandarǵa arnalǵan turǵyn úı salyndy. Bıyl «ıÝbıleınyı» shaǵyn aýdanynda 4 jalǵa beriletin úıdiń qurylysy jalǵasady. Qostanaı aýdany Zarechnyı aýylynyń «Severnyı» shaǵyn aýdanynda jalpy aýdany 15,9 myń sharshy metr 143 jeke turǵyn úıdiń qurylysy aıaqtaldy», – dedi oblys ákimi.
Sonymen qatar Qonaı shaǵyn aýdanynda 5 qabatty 30 úıdiń qurylysy bastalady. Jeke úıdiń qurylysyna 2 myńnan astam jer ýchaskesi beriledi. 2019 jyly kópbalaly jáne az qamtylǵan otbasylarǵa 422 páter berildi.
«Memlekettik-jekeshelik áriptestik boıynsha Arqalyq qalasynda 112 páterlik turǵyn úıdi qaıta jańǵyrtý jóninde 1 joba iske asyryldy. «Nurly jer» baǵdarlamasyn iske asyrý arqyly 618 jas otbasy óz páterine qonystanýǵa múmkindik berildi. Olardyń ishinde 65 pedagog, 146 dáriger bar», – dep tolyqtyrdy A.Muhambetov.
