Qostanaı oblysynda 1400 shaqyrym elektr jelisi jóndeledi
QOSTANAI. QazAqparat - 2019-2020 jyldarǵa arnalǵan jylý berý maýsymyna daıyndyq máseleleri oblys ákimi Arhımed Muhambetovtiń tóraǵalyǵymen ótken apparat májilisinde talqylandy, dep habarlaıdy QazAqparat.
Oblys ákiminiń orynbasary Ǵaýez Nurmuhambetov óz baıandamasynda óńirde kásiporyndar men bıýdjettik uıymdar jylý berý maýsymynyń sońyna deıin jetkilikti kómirmen qamtamasyz etilgenin aıtty.
«2018-2019 jyldardaǵy jylytý maýsymy aıaqtalýǵa jaqyn. Aýanyń ortasha táýliktik temperatýrasy +10°S jetkende (4.02-02-2004 SN normalaryna sáıkes) tutynýshylardy jylýdan ajyratýǵa kirisemiz. Ótken jylytý maýsymynyń qorytyndysy boıynsha óńirde barlyq saladaǵy kásiporyndar, áleýmettik sala obektileri turaqty jumys istedi. Buǵan jylytý maýsymyna daıyndyq kezeńindegi aýqymdy jumys júrgizý yqpal etti. Josparlanǵan 485,5 myń tonna kómir tıisti nysandarǵa jetkizildi. Bul turǵyda másele bolǵan joq», - dedi Ǵaýez Nurmuhambetov.
Onyń sózinshe, Qostanaı oblysynda jylytý maýsymyna daıyndyq jáne ony ótkizý qaǵıdalary negizinde oblys ákimdigi «Qostanaı oblysynyń óndiristik jáne áleýmettik keshenin 2019-2020 jyldardaǵy kúzgi-qysqy kezeńde jumysqa daıyndaý týraly» qaýly ázirledi.
«Aldaǵy jylytý maýsymyna 105 qazandyq, 736 avtonomdy jylytý júıesi, 2645 jylytý peshterin daıyndaý qajet. Sonymen qatar 734 bilim berý, 488 densaýlyq saqtaý, 701 áleýmettik nysandarda jylýdyń berilýi qamtamasyz etiledi. 88,1 shaqyrym sýmen jabdyqtaý, 18,5 shaqyrym jylý jáne 1442 shaqyrym elektr jelisin jóndeý josparlanǵan. Aldaǵy jylytý maýsymyna daıyndyq bastaldy. Barlyǵy 487,1 myń tonna kómir daıyndaýdy josparlaımyz. Atap aıtqanda, kommýnaldyq kásiporyndar úshin - 55,3 myń tonna, bıýdjettik uıymdarǵa - 104,3 myń tonna jáne turǵyndarǵa 327,5 myń tonna kómir jetkiziledi», - dedi oblys ákiminiń orynbasary.
Oblys basshysy Arhımed Muhambetov aldaǵy jylytý maýsymyna daıyndyqty kúsheıtýdi tapsyrdy.
«Búginnen bastap 2019-2020 jylytý maýsymyna arnalǵan arnaıy shtab qurylady. Ár aıda bir ret kezdesip, jylý nysandarynyń jaı-kúıi týraly esep berip otyrasyzdar. Bıylǵy qys qatty bolǵan joq, edáýir otyn únemdedik. Aldaǵyny boljaý qıyn. Sondyqtan, bólingen qarajatty retimen jumsańyzdar. Turǵyndardy jylýmen qamtamasyz etý kún tártibinen túspesin», - dep tapsyrma berdi Arhımed Muhambetov aýdan-qala ákimderine.
