Qostanaı oblysynda 14 myń avtokólik eksportqa shyǵady
QOSTANAI.QazAqparat – Qostanaı oblysynda jyl basynan beri ónerkásip óndirisi 6,5%-ke ulǵaıǵan. Bul týraly aımaq ákimdiginde ótken jıynda oblystyq ekonomıka jáne bıýdjetti josparlaý basqarmasynyń basshysy Gúlbaram Musaǵazına baıandady, dep habarlaıdy «QazAqparat» HAA tilshisi.
Ákimdiktegi apparat jıynynda ótken 7 aıdaǵy negizgi kórsetkishter talqyǵa tústi. Sandarǵa shaqsaq, jyl basynan beri aýyl sharýashylyǵy 2%-ke, negizgi kapıtalǵa ınvestıtsııa 13,8%-ke, qurylys jumystary 14,3%-ke, baspana tapsyrý 8,4%-ke artqan. Óndiristik ónerkásipter 777,5 mlrd teńgeniń, sonyń ishinde qaıta óńdeý salasy 449,5 mlrd teńgeniń ónimin óndirip, ósim 18,9%-ti qurap otyr.
«Aımaq ekonomıkasyna 162,3 mlrd teńge ınvestıtsııa tartylyp, ósim 13,8%-ti quraǵan. Jyl basynan beri mashına óndirisi 1,5 esege artty. «SaryarqaAvtoProm» kompanııasy 19,5 myń dana tehnıka shyǵardy. Ósim 1,7 esege jetti. Bıyl 50 myń kólik shyǵarý josparda bolsa, onyń 14 myńy eksporttalmaq. Al jospardaǵy 800 avtobýstyń 561-i qurastyryldy», – deıdi oblystyq ekonomıka jáne bıýdjetti josparlaý basqarmasynyń basshysy Gúlbaram Musaǵazına.
Sondaı-aq, óńirde et (3,3%), sút (1,5%) óndirý artqan. Al un (9%) jáne ósimdik maıyn (2 ese) eksporttaý qarqyny joǵary. Qurylys salasynda da ósim baıqalady. 59,5 mlrd teńge turǵyn úı salýǵa jumsalǵan. Barlyǵy 208,1 myń sharshy metr baspana tapsyrylǵan. Kórsetkishteri joǵary óńirler qatarynda Qostanaı qalasy, Denısov, Qarabalyq, Meńdiqara, Naýyrzym, Uzynkól jáne Fedorov aýdandary bar.
