Qostanaı oblysynda 130 jyldyq tarıhy bar aýyl ataýy qazaqshalandy
QOSTANAI. QazAqparat - Qostanaı oblysy Qostanaı aýdanyndaǵy aýyldyń ataýy qazaqshalandy, dep habarlaıdy QazAqparat tilshisi.
Qostanaı aýdanyndaǵy 130 jyldyq tarıhy bar Davydenovka aýylynyń ataýyn Eńbek dep ózgertý týraly bastama byltyr kóterildi. Al bıyl quramynda oblysqa tanymal aqyn-jazýshylar men jeke kásipkerler bar bastamashyl top aýdan ákimine ujymdyq hat joldaǵan-dy.
«Davydenovka aýylynyń tarıhy tereńde jatyr. Degenmen, bul ǵana emes, bizdiń oblystaǵy birneshe jer-sý ataýyn aýystyrý qajettiligi týyndap otyr. Jas urpaq ár ólkeniń tarıhyn bilýi tıis. Muny Elbasymyzdyń ózi basa aıtty. Olaı bolsa, ataýy eskirgen eldi meken de jańǵyrý úrdisinen ótýi kerek», - dedi aýyl turǵyny Ertaı Jandildın.
Alaıda, bastamashyl topqa qarsy jaýap hat jazyp, jańa ataýǵa qarsy bolǵandar da kezdesti.
«Aýyl ataýyn ózgertý úshin kóp qarajat kerek. Davydenovkany ózgertsek, barlyq qujattarymyzdy da aýystyrý qajet. Ekinshiden, aýyl burynnan osylaı atalady. Bul jerde asyqpaı, oılanyp sheshim qabyldaǵan jón», - dedi aýyl turǵyny Alekseı Grapov.
Turǵyndar aýdan ákimdiginde ótken jalpy jıynda osy máseleni kóterdi. Davydenovka aýylynda tirkeýde turǵan barlyq turǵynnyń daýys berýi arqyly sheshim shyǵaryldy. Arnaıy komıssııanyń esepteýinshe, Eńbek degen ataýdy 96 adam qoldaǵan. Qarsy bolǵandary - 63. Sonymen, Davydenovka aýyly Eńbek bolyp ózgerdi.
Eńbek aýyly - aýdan ortalyǵy Zatobol kentinen soltústik-shyǵysqa qaraı 27 shaqyrym jerde ornalasqan. Іrgetasy 1886 jyly qalanǵan.
