Qostanaı oblysynda 13 myń jańa jumys orny qurylady

QOSTANAI. QazAqparat – Qostanaı oblysynyń makroekonomıkalyq kórsetkishteri ósken. Bul týraly oblys ákimi Arhımed Muhambetovtiń tóraǵalyǵymen ótken selektorlyq keńeste málim etildi, dep habarlaıdy QazAqparat.

Oblys ákimdiginiń ekonomıka jáne bıýdjettik josparlaý basqarmasynyń basshysy Gúlbaram Musaǵazınanyń aıtýynsha, ónerkásip óndirisi 19,8%, aýyl sharýashylyǵy 2%, ınvestıtsııalar 8,7%, qurylys 8,4%, turǵyn úıdi paıdalanýǵa berý 5,4%, bólshek saýda 5,5%-ǵa ulǵaıǵan. Nátıjesinde qysqa merzimdi ekonomıkalyq ındıkator 111,8%-ǵa teń.

Jyl basynan beri oblystyń ónerkásip kásiporyndary 341,5 mlrd teńgeniń ónimin óndirdi. Onyń ishinde óńdeý ónerkásibi 194,4 mlrd teńgege tabys tapty.

«Mashına qurastyrý óndirisi 2,5 esege, metallýrgııa 29,0%-ǵa, tamaq ónimderi 18%-ǵa ulǵaıdy. Taý-ken ónerkásibinde de ósim baıqalady. Sala kásiporyndary 127,7 mlrd teńgege jýyqtaıtyn ónim shyǵarǵan. Bul kórsetkish aýyl sharýashylyǵynda 33,7 mlrd teńge. Osy ýaqytta oblys ekonomıkasyna 56,8 mlrd teńge ınvestıtsııa tartyldy», - dedi Gúlbaram Musaǵazına.

Aımaqta bıznes ókilderin qoldaý sharalary jalǵasýda. Máselen, «Bıznestiń jol kartasy-2025» memlekettik baǵdarlamasyn júzege asyrýǵa osy jyly 2,7 mlrd teńge qarajat bólindi. Qazirdiń ózinde baǵdarlama aıasynda 2,4 mlrd teńgeniń 45 jobasy maquldandy. Onyń ishinde 28 joba sýbsıdııalaýǵa ótse, 17 joba kepildendirý baǵdarlamasy arqyly iske asady.

«Infraqurylymdy jáne turǵyn úı-kommýnaldyq sharýashylyqty damytý boıynsha Jol kartasy bekitiligen. Sonyń aıasynda 275 ınfraqurylymdyq jobanyń tizimi jasaldy. Nátıjesinde eldi mekenderdi abattandyrýǵa 53,7 mlrd teńge jumsalady. Jalpy Jol kartasy sheńberinde 13435 jańa jumys orny qurylady. Jumyspen qamtý ortalyqtarynyń baǵyttary boıynsha 6718 jumyssyz azamattyń tizimi bar», - deıdi basqarma basshysy.

Óńirde nátıjeli jumyspen qamtý, «Eńbek» baǵdarlamalarynyń iske asyrylýynda irkilis joq. 2020 jyly baǵdarlamanyń oryndalýyna 8,4 mlrd teńge baǵyttalady. Bul ótken jylmen salystyrǵanda 3,1%-ǵa joǵary.