Qostanaı oblysynda 12 myńǵa jýyq oqýshy jazǵy lagerde tegin demalady
QOSTANAI. QazAqparat – Qostanaı oblysynda 12 myńǵa jýyq oqýshy jazǵy lagerde tegin demalady. Bul týraly oblys ákimdiginde ótken selektorlyq keńeste bilim basqarmasynyń basshysy Vasılıı Tsymbalıýk málim etti, dep habarlaıdy QazAqparat oblys ákiminiń baspasóz qyzmetine silteme jasap.
Bıyl oblysta 2015 oryndyq 12 demalys lageri jumys isteıdi. Olardyń ony memlekettik bolsa, ekeýi – jekeniń menshiginde. Qazir barlyq lagerler balalardy qabyldaýǵa daıyndyq ústinde.
«Osy jyly jazǵy demalys oryndaryna turmysy tómen otbasynda tárbıelenip jatqan 12 myńǵa jýyq balany tegin jiberý josparlanǵan. Bul maqsatta jergilikti bıýdjetten 74,2 mln teńge qarastyrylyp otyr. Sonymen qatar, ınternatta jatqan balalar ózderine burynnan belgilengen saýyqtyrý oryndarynda demalady. Máselen, №1 Rýdnyı arnaıy mektep-ınternatynyń 131 balasy Bákirov atyndaǵy demalys ornyna jiberiledi. Al taıaýda ǵana qaıta ashylǵan erekshe bilim berý qajettiligi bar balalardy ońaltý ortalyǵy men Qostanaı arnaıy mektebiniń 130 oqýshysy jazǵy demalystaryn «Altyngúl» lagerinde ótkizetin bolady. Sondaı-aq, oblys ortalyǵyndaǵy «Januıa» balalar úıiniń tárbıelenýshileri úshin qala syrtyndaǵy lagerlerge joldamalar satyp alynady. Bul maqsatqa oblystyq bıýdjetten 109 mln teńge qarastyrylǵan, - dedi bilim basqarmasynyń basshysy V. Tsymbalıýk.
Mektepterdiń janynan 1 myń 300-ge jýyq lager ashý josparlanǵan. Munda jalpy sany 60 myńnan astam bala jazǵy ýaqytyn ótkizedi. Buǵan qosa Til alańdary, kóshbasshylar sleti, olımpıadalyq rezerv mektepteri turaqty jumys isteıdi.
