Qostanaı oblysynda 1193 otbasyna AÁK berý toqtatyldy
QOSTANAI. QazAqparat - Qostanaı oblysynda ataýly áleýmettik kómek alýdyń zańdylyǵy boıynsha 2439 otbasy tekserildi. Onyń 116-sy kómek kórsetilý ýaqytsha toqtatylsa, taǵy 1193 otbasyna tólem berilmeıdi, dep habarlaıdy QazAqparat QR Eńbek jáne halyqty áleýmettik qorǵaý mınıstrligine silteme jasap.
Qostanaı oblysynyń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Maksım Ýstınovtiń aıtýynsha, AÁK taǵaıyndaý kezinde óńir turǵyndarynyń áleýmettik qyzmetkerlerdi aldaý faktileri kezdesken. Eń kóp taralǵan buzýshylyq – naqty tabystardy jasyrý.
«Sarykól aýdanyndaǵy kópbalaly otbasy aǵymdaǵy jylǵy mamyr aıynda aýdandyq jumyspen qamtý ortalyǵyna AÁK taǵaıyndaý úshin ótinish bildirgen. Otbasyǵa jalpy somasy 1 mln 13 myń 760 teńgege saıynǵy shartty aqshalaı kómek taǵaıyndaldy. Áleýmettik kómekke júgingen kezde otbasy basshysy jeke kásipker retinde tirkelip, salyq deklaratsııasyn nóldik tabyspen berdi. Aǵymdaǵy jylǵy tamyz aıynda turǵyn úı-turmystyq jaǵdaılardy qaıta tekserý kezinde, biz bul otbasynyń jeke menshiginde eki qabatty kottedj, «Bereke» azyq-túlik dúkeni, Volkswagen markaly avtomobıl jáne aýyl sharýashylyǵy tehnıkasy bar ekenin anyqtadyq. Qaıta esepteý nátıjesinde 1 tamyzdan bastap otbasyna AÁK kórsetý toqtatyldy», – dedi Maksım Ýstınov.
Onyń aıtýynsha, jergilikti atqarýshy organdar zańsyz taǵaıyndalǵan AÁK qaıtarý boıynsha sharalar qabyldaýda. Jalpy, osy 30 qyrkúıektegi jaǵdaı boıynsha Qostanaı oblysynan 49089 turǵyny ataýly áleýmettik kómek alǵan.
Aıta keteıik, AÁK taǵaıyndaýdyń jáne tóleýdiń durystyǵyna monıtorıng júrgizý nátıjesinde 73 myńnan astam ataýly áleýmettik kómek alýshy tabys týraly durys emes málimetter usynǵany.
Osyǵan baılanysty, Mınıstrlik ákimdiktermen birlese otyryp, árbir anyqtalǵan fakti boıynsha, buzýshylyqtarǵa jol bermeý jáne «Memlekettik ataýly áleýmettik kómek týraly» QR Zańyn buzýda zańsyz taǵaıyndalǵan tólemderdi qaıta qaraý boıynsha derbes jumys júrgizýde. Osy baǵyttaǵy jumys jalǵastyrylýda.
