Qostanaı oblysynda «112» nómirine jalǵan habarlama taratatyndar kóbeıgen
QOSTANAI. QazAqparat - Qostanaı oblysynyń TJD «112» nómirine jalǵan qońyraý shalatyndardyń qatań jazalanatynyn eskertedi, dep habarlaıdy QazAqparat.
2019 jyldyń basynan beri óńirde «112» shuǵyl qyzmet nómirine túsken qońyraýlar sany - 48769. Tótenshe jaǵdaılar departamenti sońǵy ýaqytta atalǵan nómirge jalǵan habarlama jasaıtyndardyń qatary kóbeıgenin aıtady.
«Bosqa qońyraý soǵatyndar sany kúrt ósýde. Jalǵan qońyraýlardyń qarqyny kúsheıgeni sondaı, qyzmetkerlerdiń naqty mindetterin oryndaýǵa kedergi keltiredi. Buǵan qosa «erigip» qońyraý shalýshylar telefon jelilerin bosatpaıdy. Óıtkeni, jeli bos emes bolǵan jaǵdaıda, shyn máninde kómekke muqtaj adamdar qutqarýshylarǵa ýaqytynda habarlasa almaıdy», - deıdi basqarmadaǵylar.
Oblystyq TJD turǵyndardy «112» nómirine jaýapkershilikpen qaraýǵa shaqyrady. Taǵy bir aıta keterligi, kóp jaǵdaıda kámelettik jasqa tolmaǵan balalar da «jalǵan qońyraýshylardyń» qatarynda.
«Sol sebepti, ata-analar, muǵalimder men tárbıeshilerge osy nómirge qandaı jaǵdaıda qońyraý shalý qajet ekendigi týraly naqty aqparat berip, túsindirýlerin suraımyz. Shuǵyl qyzmetter nómirine jalǵan qońyraý shalǵany úshin «Ákimshilik quqyq buzýshylyq týraly» Qazaqstan Respýblıkasy Kodeksiniń 438-baby boıynsha ákimshilik jaýapkershilikke tartylady. Memlekettik órtke qarsy qyzmet organdaryn, polıtsııany, medıtsınalyq jedel járdemdi, avarııalyq qyzmetterdi kórineý jalǵan qońyraý arqyly shaqyrǵan jaǵdaıda jeke tulǵalarǵa otyz aılyq eseptik kórsetkish mólsherinde aıyppul salýǵa ákep soǵady. Osy baptyń birinshi bóliginde kózdelgen, ákimshilik jaza qoldanylǵannan keıin bir jyl ishinde qaıtalanyp jasalǵan apattar, órtter, dúleı zilzala saldaryn joıý kezeńinde jasalǵan jalǵan áreketter jeke tulǵalarǵa alpys aılyq eseptik kórsetkish mólsherinde aıyppul salýǵa ákeledi», - dep túsindirdi oblystyq TJD mamandary.
