Qostanaı oblysynda 1 aýyl, 4 kósheniń ataýy ózgermek
QOSTANAI. QazAqparat - Qostanaı aýdanyna qarasty Glazýnov aýyly endi Aısary dep atalmaq. Bul týraly aýyl turǵyndary ótkizgen jıynda málimet etildi, dep habarlaıdy QazAqparat «Qostanaı tańy» gazetine silteme jasap.
Glazýnov aýyly jáne ondaǵy tórt kósheniń ataýyn ózgertý týraly usynys turǵyndar tarapynan jergilikti ákimdikke qańtar aıynda túsken. Selolyq okrýg ákimi Baýyrjan Nurǵazınniń aıtýynsha, bul usynys hatqa 210 adam qol qoıǵan. Qol qoıýshylardyń arasynda Semenov, Glazýnov, Stepnoı aýyldary turǵyndarynan quralǵan qaýymdastyq ókilderi bar.
«Bul qaýymdastyqty qurýshy da, múshelerin taǵaıyndaýshy da turǵyndardyń ózderi. Olar tórt jylǵa taǵaıyndalady. Mindetterine selolyq okrýgtiń barlyq bıýdjettik baǵdarlamalaryn jáne ózge de máselelerin sheshý kiredi. Bul quramda JShS dırektorlary, sharýa qojalyqtarynyń basshylary, zeınetkerler, jumyssyzdar bar. Olar aýyl ataýynyń ózgerýin jaqtap daýys berdi», - dedi B.Nurǵazın.
Sonymen, Glazýnov selolyq okrýgi Aısary okrýgi dep atalatyn bolady. Negizinde, Aısary - atalǵan eldi mekenniń kóne ataýy. Kózkórgenderdiń aıtýynsha, kezinde Aısary ózeniniń boıynda Torǵaı-Qostanaı poshta tasıtyn jol bolǵan. Keıinirek Glazýnov esimdi kópes eldi mekendi satyp alyp, qonystanýshylarǵa jalǵa berip otyrǵan. Turǵyndar osy kópestiń qurmetine aýyldy Glazýnov dep atap ketken desedi.
Endi munymen qosa, Glazýnovtaǵy Komsomol kóshesine - Táýelsizdik, Ozernyı kóshesine - Astananyń 20 jyldyǵy, Sportıvnyı kóshesine - Dostyq, Ordenonosnyı kóshesine Birlik ataýlary berilmek.
