Qostanaı oblysyna KVI anyqtaıtyn 10 myń test ákelinedi – Arhımed Muhambetov
Jıyn barysynda oblysta KVI taralýyna jol bermeý máseleleri talqylandy. Arhımed Muhambetovke óńirlik shtab basshylyǵy men Qostanaı qalasynyń ákimi Qaırat Ahmetov esep berdi. Sonymen qatar Arqalyq qalasynyń ákimi Qaırat Ábishevtiń baıandamasy tyńdaldy.
«Jitiqara aýdanynda qatań karantın rejımi engizildi. Aýdanda KVI taralýyna jol bermeý boıynsha arnaıy komıssııa jumys isteıdi. Komıssııa KVI-di anyqtaý, aýrýhanaǵa jatqyzý, eldi mekenderdi dezınfektsııalaý, sondaı-aq aýdandy azyq-túlikpen úzdiksiz qamtamasyz etý máselelerimen aınalysady. Qostanaı qalasynda qyzmetin toqtatýǵa bolmaıtyn kásiporyndar men uıymdardy qoldaý sharalary jalǵasýda», - dedi Arhımed Muhambetov.
Óńir basshysy aıtqandaı, A. Baıtursynov atyndaǵy Qostanaı ýnıversıteti janyndaǵy ǵylymı-zertteý ınstıtýty bazasynda PTR ádisimen ınfektsııany anyqtaý zerthanasy ashylady. Sonymen qatar KVI anyqtaý protsesin jedeldetý úshin jaqyn arada bizge COVID-19-ǵa 10 myń test qurylǵysy keledi.
Jıynda oblys turǵyndarynyń saıajaı ýchaskelerine barý máselesi qaraldy. Qazir aımaqta 54,5 myń saıajaı ýchaskesi tirkelgen. Olar 48 saıajaı seriktestiginiń bazasynda.
«Sońǵy ýaqytta jaýyn-shashynnyń túsýi baıqalýyna baılanysty jáne azamattardyń qaýipsizdigin saqtaý maqsatynda osy máseleni aptanyń sońynda qaıta qaraý týraly sheshim qabyldadyq. Oblys turǵyndaryn ótkiziletin is-sharalarǵa túsinistik tanytýǵa shaqyramyn. Óıtkeni olar azamattarymyzdyń densaýlyǵyn qorǵaýǵa baǵyttalǵan!» - dedi oblys ákimi jıyndy qorytyndylap.
