Qostanaı oblysyna qus tumaýyna qarsy 370 myńǵa jýyq vaktsına jetkizildi

QOSTANAI.QazAqparat – Qostanaı oblysyna qus tumaýyna qarsy vaktsınanyń 370 myńǵa jýyq danasy kelip tústi. Bul týraly Óńirlik kommýnıkatsııalar qyzmeti áleýmettik jelide jazdy, dep habarlaıdy QazAqparat tilshisi.

Otandyq dári-dármekter Aýyl sharýashylyǵy mınıstrliginiń Veterınarııalyq preparattarynyń respýblıkalyq qorynan bólingen. Qustardy vaktsınatsııalaý aýrý oshaǵy tabylmaǵan eldi mekenderden 25 kılometr radıýsta býferlik aımaqta ótedi.

«Oblysqa barlyǵy 366218 vaktsına ákelindi. Qazirgi ýaqytta jeke qosalqy sharýashylyqtarda 170 470 bas qus egildi, qus fabrıkalary óz qarajaty esebinen vaktsınatsııa júrgizýde. Jalpy oblys boıynsha 429 801 bas qus egildi. Osy ýaqytqa deıin óńirde ár túrli qustardyń 372 136 basynyń ólimi tirkelgen», delingen áleýmettik jelidegi habarlamada.

Oblystyq Veterınarııa basqarmasy basshysynyń orynbasary Baýyrjan Bekettiń aıtýynshaǵ qazir qus tumaýyna qatysty jaǵdaı tolyq baqylaýǵa alyndy.

«BAQ, ınternet-resýrstar arqyly halyq arasynda profılaktıkalyq is-sharalar, qunyn óteý máseleleri boıynsha túsindirý jumystary júrgiziledi. Oblystyń jergilikti atqarýshy organy qus tumaýyn turaqtandyrý jáne odan ári taralýyn boldyrmaý jóninde barlyq qajetti sharalardy qabyldaýda», - dep túsindirdi basqarma basshysynyń orynbasary.

Buǵan deıin Arqalyq qalasyndaǵy qus fabrıkasynda 296 446 qus qyrylyp qalǵany belgili boldy.