Qostanaı oblysyna kóship barýshylarǵa myńǵa jýyq jumys orny usynyldy
QOSTANAI. QazAqparat - Bıyl Qostanaı oblysyna elimizdiń basqa óńirlerinen 300-ge jýyq otbasy qonys aýdarmaq. Olar úshin baspana, jumys oryndary ázirlendi, dep habarlaıdy QazAqparat.
Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenova aıtqandaı, bıyl jumys kúshi tapshy aımaqtarǵa otbasylardy kóshirý boıynsha jospar jasaldy. 2016 jyly Qostanaıǵa basqa oblystardan - 22, 2017 jyly - 30 ǵana otbasy qonys aýdarǵan. 2018 jyly bul kórsetkish 10 esege ulǵaıdy. Bıyl Qostanaı oblysy 272 otbasyn qabyldaýǵa daıyn.
«Qazir biz syrt oblystardan qonys aýdarýshylar úshin arnaıy pasporttar ázirledik. Onda óńirdiń áleýmettik ınfraqurylymy: mektepter, mektepke deıingi mekemeler, densaýlyq saqtaý jáne basqa da nysandar týraly derekter kórsetilgen. Kelýshilerdi qabyldaıtyn aýdan-qalalar bos jumys oryndardyń tizimin jasady. Búginde 216 jumys berýshi 962 bos oryn usyndy. Sondaı-aq, otandastarymyzdy turǵyn úımen qamtamasyz etý máselesi sheshilip keledi. Otbasylardyń qosalqy sharýashylyqpen aınalysýyna da múmkindik bar», - dedi basqarma basshysy.
Belgili bolǵandaı, oblysqa muǵalim, mehanızator, dáriger, kólik júrgizýshileri sııaqty mamandar jetispeıdi. Gúlnar Ábenovanyń aıtýynsha, ońtústikten keletin otbasylar joǵaryda atalǵan mamandyqtarǵa qyzyǵýshylyq tanytyp otyr.
«Bizdiń vedomstvo árbir qala, aýdandardaǵy jyljymaıtyn múlik naryǵyna saraptama júrgizdi. Máselen, aýdan ortalyqtaryndaǵy baspana 500 myń teńgeden bastap, 6 mln teńgege deıin baǵalandy. Al aýyldarda 300 myń teńge kóleminde úı tabýǵa bolady. Qalalyq jerlerde páter baǵasy 1,5-9 mln teńge aralyǵynda», - dep derek keltirdi G.Ábenova.
Aıta keteıik, qostanaılyq delegatsııa aqpan aıynda Mańǵystaý oblysyndaǵy bos oryndar jármeńkesine qatysty. Sonymen qatar naýryz-sáýir aılarynda basqa oblystarda ótetin jármeńkelerge qatysyp, Qostanaıǵa kelýge qyzyǵýshylyq tanytqan mamandardy izdeıdi. Bıyl oblys boıynsha nátıjeli jumyspen qamtý jáne jappaı kásipkerlikti damytý baǵdarlamalaryna 1 mlrd teńgeden astam qarajat qarastyrylǵan.
