Qostanaı oblysyna karantın rejımi engiziledi
NUR-SULTAN. QazAqparat – Qostanaı oblysy aýmaǵynda 2020 jylǵy 17 sáýirde saǵat 00:00-den bastap karantın rejımi engiziledi. Bul týraly Taýarlar men qyzmetterdiń sapasy men qaýipsizdigin baqylaý departamentiniń basshysy Oral Bekmaǵambetov aıtty, dep habarlaıdy QazAqparat tilshisi.
«Qostanaı oblysy aýmaǵynda 2020 jylǵy 17 sáýirde saǵat 00:00-den bastap karantın rejımi engiziledi. Koronavırýsqa qatysty epıdemıologııalyq jaǵdaıdyń shıelenisýine baılanysty aýrýdyń aldyn alý maqsatynda Qostanaı oblysynyń bas medıtsınalyq sanıtarlyq dárigeri oblys aýmaǵyna karantın engizý týraly qaýly shyǵardy», - deıdi Oral Bekmaǵambetov onlaın brıfıngte.
Onyń aıtýynsha, Qostanaı oblysyn Mysyrdan aýrý juqtyryp kelgen úsh adam qazirgi ýaqytta emdelip jatyr.
«Oblys boıynsha koronavırýstan 75 jastaǵy adam kóz jumdy. Bizdiń departament adamdardy koronavırýstan qorǵaý úshin profılaktıkalyq sharany qolǵa alyp jatyr. Búgingi tańda oblys boıynsha 2500-den astam adam karantınde. Búgingi tańda eń aldymen koronavırýsqa uqsas belgileri bar adamdar tekseristen ótedi. Olar ókpe qabynýy bar, sozylmaly dertteri bar jáne aýrý juqtyrǵandarmen baılanysta bolǵan adamdar», - deıdi ol.
