Qostanaı oblysyna bes óńirden 10 myń otbasy kóship barady
QOSTANAI. QazAqparat - Bıyl Qostanaı oblysyna memlekettik baǵdarlama boıynsha elimizdiń ońtústiginen 30 otbasy kóship keledi. Olardyń barlyǵy eldi mekenderge ornalastyrylyp, jumyspen, baspanamen qamtamasyz etiletin bolady, dep habarlaıdy QazAqparat tilshisi.
2017 jyly «Nátıjeli jumyspen qamtý jáne jappaı kásipkerlikti damytý» memlekettik baǵdarlamasy aıasynda ońtústik óńirlerden soltústikke otbasylardy kóshirýge 710 mln teńge qarastyrylǵan. Baǵdarlamanyń maqsaty - halqy tyǵyz ornalasqan ońtústikten soltústik aımaqqa kósh basyn burý. Bul jumyssyzdyq pen kadr tapshylyǵy máselesin qatar sheshýge múmkindik beredi.
«Joǵaryda atalǵan qarjyǵa materıaldyq kómek retinde olardyń kóshýine sýbsıdııa beriledi. Ol 35 aılyq eseptik kórsetkish nemese 79 415 teńge. Bul qarjy ár otbasy múshesine esepteledi. Ekinshi kómek, olardyń sol jerdegi úıdi jalǵa alýǵa beriletin sýbsıdııa. Ol 12 aı ishinde beriledi. Qarjy kólemi ár otbasy úshin 34 myńnan 68 myń teńge aralyǵynda bolady. Aqsha turyp jatqan eldi mekenine: qala nemese aýylǵa ári otbasy músheleriniń sanyna baılanysty tólenedi», - dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń bas mamany Baqyt Ábilqaıyrqyzy.
Qonys aýdarýshylardy jumyspen, baspanamen qamtýdy jumys berýshi tarap óz moınyna alady. Jyl aıaǵyna deıin Almaty, Jambyl, Qyzylorda, Mańǵystaý jáne Ońtústik Qazaqstan óńirlerinen bizdiń oblysqa 30 otbasy qonys aýdarady dep josparlanǵan. Olar Qostanaı oblysynyń on bir eldi mekenine turaqtaıdy. Jalpy aldaǵy bes jyl ishinde astyqty ólkege 10 myń otbasy kóship keledi.
