Qostanaı oblysyna 20 tonna dári-dármek jetkizildi

Oblystyq densaýlyq saqtaý basqarmasy dárilik saıasat jáne dári-dármekpen qamtamasyz etýdi úılestirý bóliminiń basshysy Gúlnar Ospanova atap ótkendeı, mamandar shet elderden kelgen gýmanıtarlyq kómekti qabyldap, tekserip aldy. Eń bastysy KVI-men kúreste qoldanylatyn «Favıpıravır» emdeý preparaty keldi. Bul dári Qazaqstanǵa birinshi ret ákelinip otyr.

20 tonna dári-dármek oblys ortalyǵyndaǵy «Іńkár» seriktestigine tapsyryldy. Qazir seriktestik qoımasynda asa zárý dáriniń 23 túri bar. Máselen, munda bir ǵana paratsetamoldyń 35 myń qaptamasy tur. Tseftrıakson, azıtromıtsın, levofloksatsın, novokaın, antıgrıppın, analgın, zıtmak, kardıomagnıl, ksarelto sııaqty dáriler kesheden beri dárihanalarǵa taratylyp jatyr.

Jalpy, Qostanaı oblysynda 281 dárihana bar. Búginnen bastap sonyń bárine jedel túrde dári jetkizilip jatyr. Eń birinshi kezekte oblys ortalyǵynan shalǵaı ornalasqan Arqalyq, Amangeldi, Jangeldi, Jitiqara aýdandaryn áleýmettik mańyzy bar dári-dármekpen qamtý mindeti tur. Jańa kelip túsken dárilerdiń baǵasy mamandardyń baqylaýynda.

Oblysta COVID-19 vırýsyn anyqtaıtyn 5 zerthana jumys isteýde. Búginde «Ulttyq saraptama ortalyǵy» fılıalynda 3 zerthana jáne «Olımp» klınıkalyq-dıagnostıkalyq zerthanasy úzdiksiz jumys isteýde. 1 zerthana 29 mln teńge demeýshi qarajatynyń esebinen satylyp alynǵanyn aıta ketken jón. Búginge deıin jalpy sany 46 myńǵa jýyq zertteý jumystaryn júrgizgen bul zerthanalarda táýligine 2 myńǵa deıin taldaý jasalady.

Іndetke qarsy júzege asyrylyp jatqan keshendi is-sharalar barysynda aımaqtaǵy emdeý mekemelerinde naýqastarǵa arnalǵan 1668 tósek-oryn qoıyldy. Onyń 584-i koronovırýs indeti naqty anyqtalǵan naýqastarǵa arnalǵan. Bul tósek-oryndarda qazir 260 adam jatyr, qalǵany bos tur. Sondaı-aq, indet belgileri bar adamdardy oqshaýlaý úshin 1084 provızorlyq tósek-oryn daıyndaldy.