Qostanaı oblysyn gazdandyrýdyń arnaıy baǵdarlamasy ázirlendi
QOSTANAI. QazAqparat - Qostanaı oblysynyń eldi mekenderin gazdandyrý boıynsha arnaıy baǵdarlama ázirlendi. Bul týraly QR Parlamenti Májilisiniń depýtattary qatysqan jıynda belgili boldy, dep habarlaıdy QazAqparat.
Halyq qalaýlylary Irına Aronova, Aıgúl Nurkına men Jámılá Nurmanbetova Qostanaı oblysyna jumys sapary aıasynda Qostanaı aýdanynda boldy. Olar áýeli aýdandaǵy Ozernoe eldi mekeniniń aktıvimen kezdesti. Onyń barysynda eldegi áleýmettik bastamalardyń mán-mańyzyn, negizgi tetikterin túsindirdi. Sondaı-aq «Karl Marks» atyndaǵy sharýa qojalyǵy basshylyǵymen jáne jumysshylarymen júzdesip, qazirgi tańdaǵy aýyl sharýashylyǵyna qatysty tyń jańalyqtarymen bólisti. Ozernoe aýylynyń turǵyndary gazdandyrý boıynsha saýaldaryn joldady. Bul másele burynnan beri sheshilmeı kele jatqandyǵyn aıtady. Degenmen, depýtattar turǵyndardy jaqsy jańalyqpen qýantty.
«Aımaqtardy gazdandyrý sharalary boıynsha Qostanaı oblysy boıynsha arnaıy baǵdarlama ázirlendi. Buǵan shamamen 4 mlrd teńge qarajat bólindi. Al Ozernoe aýylyna gaz qubyryn ótkizý úshin 600 mln teńge qarastyrylǵan. Qurylys jumystary 2020 jyldan bastalady», - dedi depýtaty Irına Aronova.
Tobyl óńirine kelgen májilismender Ozernoe orta mektebine baryp, mundaǵy bilim berý júıesimen tanysty. Shaǵyn mekteptegi pedagogtardyń jetispeýshiligi de sóz boldy. ıAǵnı, bir muǵalim birneshe profıldi emes pánderden sabaq berýge májbúr.
«Bul suraq depýtattyq saǵattarda birneshe ret kóterildi. Másele qaralý ústinde. Jaqyn arada shaǵyn qamtylǵan mektepterde pedagogtardy daıyndaýǵa arnalǵan arnaıy ortalyqtar ashylatyn bolady»,- dep túsindirdi Jámılá Nurmanbetova.
Kezdesýde aýyldyń qordalanǵan problemalary talqyǵa tústi. Máselen, Moskovskıı men Ozernoe eldi mekenin jalǵaıtyn jol joq. Buǵan aýyl ákimi bıyl eki aýylda jol jóndeý jumystary júrgiziletinin aıtty. Al Aleksandrovskoe aýyly josparǵa kirmeıdi, atalmysh baǵyttaǵy joldy 2020 jyly jóndeý kózdelýde.
Depýtattardyń óńirge jumys sapary jalǵasýda.
