Qostanaı oblysy týrıster sanyn qalaı arttyrmaq
QOSTANAI. QazAqparat - Qostanaı oblysyna kelýshi týrıster qatary 13 paıyzǵa artty. Bul týraly oblys ákimdiginde ótken apparat májilisinde aıtyldy, dep habarlaıdy QazAqparat.
Qostanaı oblysy ákimdiginiń kásipkerlik jáne ındýstrıaldyq-ınnovatsııalyq damý basqarmasy basshysynyń mindetin atqarýshy Roza Gorıannaıanyń sózinshe, 2018 jyly oblysta týrızm salasynyń ósý úrdisi baıqalady. Týrıstik salada kórsetiletin qyzmetter kólemi 14,7% artqan. Bul baǵytta 1,7 mlrd teńge jumsaldy.
«Oblysqa kelgen sheteldik týrısterdiń qatary 13,1% kóbeıgen, ortasha eseppen 20,4 myń adam tirkeldi. Sonymen qatar, ótken jyly týrızm salasy boıynsha jobalyq basqarý modeli engizildi. Onyń sheńberinde «Negizgi kapıtalǵa ınvestıtsııalardyń ósýi», «Jalpy qosymsha qunnyń ósýi», «Eńbek ónimdiligin arttyrý», «Jumyspen qamtylǵan halyq sany» atty 4 ındıkator anyqtaldy. Byltyr Qazaqstannyń TOP-50 óńirlik deńgeıdegi týrıstik kartasyna Qostanaı oblysy saýyqtyrý jáne ańshylyq-oljalyq týrızm aımaǵy retinde bekitildi. Osyǵan baılanysty biz tıisti jol kartalaryn ázirledik», - dedi ol.
Roza Gorıannaıanyń aıtýynsha, keıbir jergilikti ákimdikter týrızm máselesine nemquraıly qaraıdy. Basqarma jumysynan bólek, jergilikti týrıstik ónimderdi jyljytý boıynsha usynystar joq. Ákimdikterdiń saıttarynda aımaqtyń kórikti jerleri týraly sapasyz fotomaterıaldar ornalastyrylǵan. Tıisinshe, bul sheteldik týrısterdiń qyzyǵýshylyǵyn arttyrmaıdy.
«Sol sebepti, qalalar men aýdandar ákimdikteri ózderiniń ınternet-resýrstarynda týrıstik obektiler týraly, osy baǵyttaǵy is-sharalardy ornalastyrýy tıis. Óńirdiń kórikti jerleri týraly aqparatty jańartý jáne ózektendirý boıynsha jumys júrgizýi qajet. Aǵymdaǵy jyldyń mamyr aıynda bizdiń basqarma aımaqtyq týrıstik kórmesin ótkizip, aqparattyq týr uıymdastyrdy. Bul is-sharaǵa Qazaqstan men Reseı Federatsııasynyń bıznes ókilderi qatysty. Sonda meımandar birneshe ıgi tilekterin, usynystaryn jetkizdi. Sondaı-aq, aǵymdaǵy jyly Bilim basqarmasymen birlesip, «Eýropa - Azııa» atty halyqaralyq týrıstik festıval ótkizemiz. Aýqymdy sharaǵa daıyn bolýymyz kerek», - deıdi Roza Gorıannaıa.
Al Arhımed Muhambetovtyń atap ótýinshe, óńirdiń týrıstik áleýetin kórsetetin oryndarda jumystardy sapaly ári turaqty túrde júrgizý qajet.
«Jalpy, oblys boıynsha týrıster sany artqanymen, Fedorov, Altynsarın, Naýyrzym aýdandaryna kelýshilerdiń qatary kemigen. Atalǵan aýdandardyń ákimderine saraptama júrgizýdi tapsyramyn. «Sosnovyı bor» demalys aımaǵy, Naýyrzym qoryǵy bar. Bular oblys týrızminiń basty qundylyqtaryna jatady. Al sizder týrıster sanyn ulǵaıtýdyń ornyna, tómendetip otyrsyzdar. Bálkim, meımandarǵa jaqsy jaǵdaı jasalmaǵan shyǵar. Ony da qarańyzdar. Budan bólek, ár aýdan men qalalardyń týrıstik áleýetin kórsetetin aqparattyq materıaldar daıyndańyzdar», - dep tapsyrdy Arhımed Muhambetov.
