Qostanaı oblysy tolyqtaı tsıfrlyq habar taratýǵa kóshti
Oblystyq ishki saıasat basqarmasy basshysy Záýre Báımenova jýrnalıstermen ótken brıfıngte óńirde analogtyq teledıdar tolyǵymen ajyratylǵanyn aıtty.
«1 shildeden bastap Qostanaı oblysy tsıfrlyq habar taratýǵa tolyq ótti. Endi shalǵaı aýyl turǵyndary teledıdardy eń joǵary sapada tegin kóre alady. Buǵan deıin halyq arasynda aqparat-nasıhat jumystaryn júrgizdik. Qostanaı oblysynda analogty telehabar taratýdy ajyratý jáne tsıfrlyq habardy sátti qosý maqsatynda 59 radıo-televızııa stansasy salyndy. Bul oblys turǵyndarynyń 98%-in tsıfrlyq teleradıo habarlaryn taratýmen qamtýǵa múmkindik beredi», - dedi Záýre Báımenova.
Oblystaǵy 627 eldi mekenniń 49-na tehnıkalyq múmkindikterge baılanysty sapaly habar taratylmaıdy. Olar arnaıy sıgnal qabyldaý aımaǵyna kirmeıdi. Osylaısha, 2 myńǵa jýyq úı sharýashylyǵynyń tsıfrlyq telehabar taratý júıesine ený múmkindigi joq. Degenmen, olar OTAU TV ulttyq operatorynyń jerseriktik teledıdaryna qosyla alady. Qazir oblysta mundaı 50 myń abonent bar.
Búginde oblystyq jáne aýdandyq ákimdikter ataýly áleýmettik kómek alatyn barlyq otbasylardy sapaly habar taratý júıesimen qamtamasyz etý úshin qajetti sharalar qabyldady. Óńirimizde 687 az qamtylǵan nemese kópbalaly otbasyǵa sandyq habar taratý resıveri tegin berildi.