Qostanaı oblysy sottarynyń barlyǵynda aýdıo-beıne baqylaý bar
QOSTANAI. QazAqparat - Búginde Qostanaı oblysy sottarynyń 100 paıyzy aýdıo-beıne tirkeýmen jabdyqtalǵan, dep habarlaıdy «QazAqparat» HAA tilshisi oblystyq sottar ákimshisiniń basshysy Ábdijámı Quldúısenovke silteme jasap.
Osy máselege baılanysty jıynda aıtylǵandaı, sot tóreligin júzege asyrý, sot isin júrgizýdiń ashyqtyǵyna qol jetkizý boıynsha jumystardy ońtaılandyrýdyń perspektıvalyq baǵyttarynyń biri - aqparattyq tehnologııalardy keńinen qoldaný.
«Aımaqtaǵy sottardyń barlyǵy sot zaly aýdıo jáne beınejazba quraldarymen jabdyqtaldy. Sondaı-aq, kompıýterler men uıymdastyrý tehnıkasymen qamtamasyz etý boıynsha jumystar júrgizildi. Atalǵan jaıt sybaılas jemqorlyqqa qarsy baǵyttalǵan is-áreketterdiń týyndaýyna kedergi bolatyny anyq. Sot hatshylary qazir burynǵydaı sot májilisiniń hattamasyn jasaqtamaıdy, taraptardyń sot májilisinde aıtqan sózderi aýdıo-beıne taspasyna jazylyp alynyp, sot májilisi aıaqtalǵasyn olardyń ótinishteri boıynsha qoldaryna beriledi», - dedi Quldúısenov.
Sonymen qatar, qazirgi tańda sot isin júrgizýdi avtomattandyrý jáne ońtaılandyrý maqsatynda «Sot kabıneti» jáne «Sot qujattarymen tanysý» aqparattyq servısteri iske asyrylýda.
Ábdijámı Quldúısenovtiń aıtýynsha, 2016-jyly 47041 sot isiniń 44924-i aýdıo-beıne tirkeý arqyly qaraldy.
«Sot júıesinde zamanaýı tehnologııalardy paıdalaný sot isin júrgizýdi jeńildetedi, tóreshilik kedergilerdi qysqartady, sot organy qyzmetkerleriniń azamattarmen baılanysyn azaıtady», - dedi oblystyq sottar ákimshisiniń basshysy.
