Qostanaı oblysy memorgandardaǵy áıelder sany boıynsha kósh bastap tur
ASTANA. QazAqparat - QR Prezıdenti janyndaǵy áıelder isteri jáne otbasylyq-demografııalyq saıasat jónindegi ulttyq komıssııa men Ortalyq saılaý komıssııasynyń birlesken otyrysy ótti, dep habarlaıdy QazAqparat.
«Prezıdenttiń jarııa etilgen «Bes áleýmettik bastamasy» áıelder qoǵamdastyǵy jumysyna zor serpin beredi. Sonymen qatar Elbasynyń «Tórtinshi ónerkásiptik revolıýtsııasy jaǵdaıyndaǵy jańa múmkindikter» Joldaýynda jáne «Rýhanı jańǵyrý» baǵdarlamalyq maqalasynda kórsetilgen maqsattardyń oryndalýyna barlyq áıelder uıymdary jumylýy qajet», - dedi QR Memlekettik hatshysy Gúlshara Ábdiqalyqova.
Atap aıtqanda, otyrys barysynda saılaý protsesindegi áıelderdiń qatysýynyń genderlik aspektileri týraly aqparat tyńdaldy.
Memlekettik hatshy Qazaqstannyń 1995 jyldan bastap, Beıjiń deklaratsııasyna qosylǵan kezden genderlik saıasatty júıeli túrde iske asyrýǵa baǵyt alǵanyn atap ótti. Teń quqyqtylyqtyń zańnamalyq negizin damytýǵa múmkindik beretin 2006-2016 jyldarǵa arnalǵan Genderdik teńdik strategııasy tabysty iske asyryldy.
Dúnıejúzilik ekonomıkalyq forýmnyń genderdik ındeksine sáıkes, 2017 jyldyń qortyndysy boıynsha Qazaqstan 144 memlekettiń arasynda 52-shi oryndy ıelendi. Onyń ishinde «áıelderdiń ekonomıkalyq qatysýy men múmkindikteri» kórsetkishinde - 30-shy, «densaýlyq ındeksinen» - 36-shy jáne «bilim deńgeıi» boıynsha 48-shi orynnan kórindi.
Otyrys kezinde áıelderdiń memlekettik qyzmette jáne saılanbaly organdarda sheshim qabyldaý deńgeıindegi ókildigi boıynsha statıstıkalyq maǵlumattar aıtyldy. Barlyq memlekettik qyzmetkerlerdiń 55 %-yn áıelder quraıdy. Basshylyq qyzmettegi áıelder úlesi - 39,5%, onyń ishinde joǵary basshylyq qyzmette - 29%. Bul óz kezeginde EYDU-nyń ortasha kórsetkishine saı keledi.
Taratylǵan málimetterge qaraǵanda, Qostanaı oblysy máslıhattarda jáne basqa da memlekettik organdarda áıelder sany boıynsha kósh bastap keledi. Máslıhattardyń barlyq deńgeıindegi áıelder depýtattyq oryndardyń 31 paıyzyn, al ákimshilik memlekettik qyzmetkerlerdiń 61 paıyzyn quraıdy. Osy oraıda atqarylyp jatqan jumystar boıynsha Qostanaı oblysy ákiminiń orynbasary Marat Júndibaev baıandama jasady.
Birlesken otyrysqa QR Ortalyq saılaý komıssııasynyń tóraǵasy Berik Imashev, Parlament depýtattary, halyqaralyq uıymdardyń, saıası partııalardyń ókilderi qatysty.
