Qostanaı oblysy medıtsına jáne pedagogıka mamandyqtaryna bilim grantyn kóbeıtedi
ASTANA. QazAqparat - Qostanaı oblysynyń ákimdigi jyl saıyn jergilikti bıýdjet esebinen bólinetin bilim grantyn kóbeıtedi, dep habarlaıdy QazAqparat tilshisi.
Bul týraly Qostanaı oblysynyń ákimi Arhımed Muhambetov óńirdegi "Rýhanı jańǵyrý" baǵdarlamasyn júzege asyrý týraly baspasóz máslıhatynda habarlady.
"Jyl saıyn jergilikti bıýdjet esebinen joǵarǵy jáne joǵarydan keıingi bilimi bar mamandar daıarlaý úshin qarajat bólinedi. Ótken jyly tehnıkalyq, tehnologııalyq jáne pedagogıkalyq mamandyqtarǵa 41 grant bólinse, bıyl 200 grant qarastyryp otyrmyz. Ondaǵy 100 grantty medıtsına mamandyǵyna bólemiz, sebebi bizdiń óńirde medıtsına mamandary jetispeıdi. 60 grantty pedagogıka salasyna beremiz jáne 40 grant - aýyl sharýashylyǵy mamandyqtaryna bólinedi", - dep túsindirdi óńir basshysy Ortalyq kommýnıkatsııalar qyzmetinde ótken baspasóz máslıhatynda.
Ákim Qostanaı óńirinde medıtsınalyq JOO bolmaǵandyqtan, bolashaq dárigerlerdi Astana men Qaraǵandydaǵy oqý oryndarynan izdestirgenin aıtty.
"Jaqynda ǵana Qaraǵandydaǵy ıntern-stýdenttermen kelisimshart jasastyq. Olar 2 jyl bizdiń grantpen bilim alady da, 5 jyl Qostanaı óńirinde jumys isteýge mindetteledi. Jalpy qazirgi ýaqytta Qostanaı óńirine, ásirese Torǵaı jaqqa 250 medıtsına mamany qajet. Sondyqtan, grant sanyn jyl saıyn kóbeıte bermekpiz", - dep óz sózin túıindedi ákim.
