Qostanaı oblysy kıeli nysandarynyń tizimi jasaldy

  QOSTANAI. QazAqparat - Qostanaı oblysynyń qasıetti oryndary «Kıeli Qazaqstan» jobasynyń arnaıy tizimine alyndy. Bul týraly óńirlik kommýnıkatsııalar qyzmetinde málim etildi, dep habarlaıdy QazAqparat tilshisi.

Respýblıkalyq etnomádenı ekspedıtsııasynyń qatysýshylary Tobyl-Torǵaı óńirine taban tiredi. Osy kúni Qostanaı oblysynda 34 kıeli nysan anyqtalǵan. Olardyń 10-y jalpyulttyq mánge ıe bolsa, 24 nysan jergilikti mańyzǵa ıe dep tanyldy. Aldaǵy ýaqytta Seıtqul Mamanuly kesenesi, «Tatyr shaıqasy» belgisi, Tilep Aspantaıuly beıiti, A. Baıtursynov týystarynyń beıiti, Nurhan Ahmetbekov zıraty, Qazybaı áýlıe jáne Baımyrza áýlıe Mergenuly keseneleri oblystyq tizimge enedi. Munan bólek ár aýdandy aralap júrgen «Tobyl-Torǵaı» murasy ekspedıtsııasy jergilikti qasıetti oryndar týraly tizim jasaıtyn bolady.

Eske salsaq, ústimizdegi jyldyń tamyz aıynda Qazaqstannyń kıeli 100 nysany jarııalanǵan-tyn.  Negizgi maqsat - Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn nasıhattap, Qazaqstannyń tarıhı-mádenı murasyn saqtaý.

«Biz ár óńirlerdegi zııaly qaýym ókilderimen, aýyl aqsaqaldarymen kezdesip, kıeli oryndar týraly aqparat alý úshin ekspedıtsııa uıymdastyrdyq. Bul bastama bir jyl ishinde aıaqtalyp qalmaıdy. Kıeli nysandardy anyqtaý keminde bes jyl júzege asady», - dedi tarıh ǵylymdarynyń doktory Aıman Dosymbaeva.

Aldyn ala iriktelgen tizimge jergilikti ólketanýshylardyń usynǵan ańyzdary men el aýzyndaǵy áńgimeleri bar jańa nysandar tizimi qosyldy. Tarıhshylar Túrkebaı áýlıe beıiti, Qoıanaq áýlıe kesenesi, Satybaldy ıshan kesenesi týraly málimetterdiń azdyǵyn alǵa tartty. Sondaı-aq, oblystyń kıeli oryndary kartasyna engiziletin nysandardy tereńdete  zertteý qajettiligi jaıynda aıtyldy.