Qostanaı oblysy ınvestorlarǵa 157 jobany tanystyrady
ASTANA. QazAqparat - Qostanaı oblysy ınvestıtsııa tartý úshin tyń múmkindikterge jol ashý baǵytynda udaıy belsendi jumys júrgizip keledi. Osyǵan baılanysty 5-sáýirde Astana qalasyndaǵy «Rixos» qonaq úıinde dıplomatııalyq korpýs úshin Qostanaı oblysynyń ınvestıtsııalyq tartymdylyǵyna arnalǵan forým ótkizilmek, dep habarlaıdy QazAqparat oblystyq ákimdiktiń baspasóz qyzmetine silteme jasap.
«Qostanaı oblysynyń ákimdigi óńirge ınvestıtsııa tartý baǵytynda jan-jaqty jumystar atqaryp jatyr. Óńirde básekege qabilettilik basymdyqtarynyń deńgeıin kóterý jáne oblystyń ınvestıtsııalyq klımatyn jaqsartýǵa baǵyttalǵan qadamdar qarastyrylǵan. Máselen, ótken jyly syrtqy ınvestıtsııalardyń jalpy kólemi 11,1 mlrd. teńgeni qurap, kórsetkish 2015 jylǵa qaraǵanda 11% artty», - delingen baspasóz baıanynda.
Óńirdiń ekonomıkalyq damýy úshin kásiporyndardyń syrtqy ekonomıkalyq qyzmetin jandandyrý, olardy halyqaralyq saýdaǵa ıntegratsııalaý úlken mańyzǵa ıe ekeni túsinikti. Bul rette 2016 jyly oblystyń syrtqy saýda aınalymy 1,6 mlrd dollardy quraǵan. Saýda aınalymy qurylymynda eksporttyq jetkizilimder 53,5 paıyzǵa nemese 870,3 mln. dollarǵa jetken. Al ımporttyq operatsııalar úlesi 46,5 paıyz bolyp, 785 mln. dollardy qurady. Sonyń ishinde sońǵy jyldary memlekettik qoldaýdyń arqasynda aıtarlyqtaı óndiristik-ekonomıkalyq áleýetke kóterilgen agroónerkásiptik keshen aýyl sharýashylyǵy ónimderiniń barlyq túrleri boıynsha ornyqty ósimge qol jetkizdi. Al aýyl sharýashylyǵy ónimderiniń jalpy kólemi 2010 jyldan 2016 jylǵa deıingi aralyqta 1,5 esege artyp, 947 mln dollardy quraǵan.
«Qostanaı oblysy respýblıkanyń jetekshi agroónerkásiptik kesheni retinde elimizdiń «nan sebetine» de ózindik úlesin qosyp keledi. Tek 2016 jyldyń ózinde 1107 myń tonna un óndirilip, 956 myń tonnasy oblystan tysqary aýmaqqa jóneltilgen. Onyń 860 myń tonnaǵa jýyǵy nemese shamamen 90 paıyzy shetelge eksporttalǵan. Budan bólek, 2016 jyly 1,4 mln. tonna astyq daqyldary, 900 myń tonnadan astam ósimdik maıy eksporttaldy», - delingen baspasóz baıanynda.
Aıta keterligi, Qostanaı qalasynda ınvestorlar tartý úshin jalpy aýmaǵy 400 gektar bolatyn ındýstrııalyq aımaq qurylysy júrip jatyr. Odan bólek, óńirde Qostanaı Agroónerkásip kesheni parki jobasy da qolǵa alynǵan. Respýblıka boıynsha biregeı sanalatyn atalǵan joba aýyl sharýashylyǵy salasynyń eksporttyq áleýetin arttyrýǵa, aýyl sharýashylyǵy ónimderi saýdasynyń biregeı júıesin qurýǵa, ónimderdi deldalsyz satý múmkindikterin keńeıtýge septigin tıgizedi.
Yqtımal otandyq jáne sheteldik ınvestorlarǵa tanystyrý maqsatynda bos, toqtap qalǵan obektiler, ınvestıtsııa qajet etetin jer ýchaskeleri sekildi basqa da jobalar tizimi jasalǵan (oǵan 157 obekti enip otyr). Bul tizimge engen jobalar forým barysynda sheteldik elshilerge tanystyrylatyn bolady. Jalpy forýmǵa Qostanaı oblysynyń 30 kásiporyn ókilderi qatysyp, onyń aıasynda 37 joba tanystyrylmaq, sonyń ishinde jalpy somasy 1,5 trln teńgeni quraıtyn 24 joba bar. Al ondaǵy 13 jobanyń eksportqa baǵdary basym. Jıyn qorytyndysy boıynsha birqatar kelisimsharttar men memorandýmdar jasalady dep kútilýde. Tutastaı alǵanda forým óńirdiń áleýmettik-ekonomıkalyq damýyn arttyryp, Qostanaı oblysynyń ónimderin eksportqa shyǵarý úshin ártúrli elderdiń bıznes-qurylymdarymen ózara kómekti kúsheıtýge septigin tıgizetin bolady. Jıynǵa Qostanaı oblysynyń ákimi A.Muhambetov, Syrtqy ister mınıstri Q.Ábdirahmanov, Investıtsııalar jáne damý mınıstri J.Qasymbek, shet memleketter elshileri, BAQ ókilderi, sondaı-aq 150-ge tarta múddeli taraptar qatysady.
