Qostanaı oblysy halqynyń 30 paıyzy sportpen shuǵyldanady
QOSTANAI. QazAqparat - Qostanaı oblysy turǵyndarynyń buqaralyq sportpen aınalysýy 29,7%-dy qurady. Bul týraly óńirlik kommýnıkatsııalar qyzmetinde ótken brıfıngte oblystyq dene tárbıesi jáne sport basqarmasynyń basshysy Evgenıı Vılıams aıtty, dep habarlaıdy QazAqparat.
Basqarma basshysynyń sózinshe, búginde oblystyń 260,7 myń turǵyny sportpen shuǵyldanady. Bul 29,7%-ǵa teń. Aıta keteıik, turǵyndardyń buqaralyq sportpen aınalysýynyń respýblıkalyq kórsetkishi - 28,0%.
«Turǵyndardyń sportqa den qoıýy ár óńirde ashylǵan sport sektsııalarynyń sapasyna baılanysty. 2018 jyly oblys boıynsha 7 672 dana sport úıirmesi tirkeldi. Munda barlyǵy sporttyń 132 túri qamtylǵan. Aýyldyq jerlerde 5000-ǵa jýyq sport úıirmesi jumys isteıdi», - dedi E. Vılıams óz baıandamasynda.
Bıyl oblys ortalyǵynan shalǵaı aýyldarda 75 myń adam dene tárbıesine den qoıǵan. Jyl basynan beri óńirlerde 14 jańa sport ujymdary quryldy.
E. Vılıams aıtqandaı, aımaqta sport salasyndaǵy selektsııalyq jumystar bir izge qoıylǵan. Máselen, oblysta balalar men jasóspirimderdiń 36 klýby turaqty jumys isteıdi. Byltyr Arqalyq qalasy men Amangeldi aýdanynda balalardyń sport ortalyǵy quryldy.
«2016-2017 jyldary qalalar men aýdandardyń ákimdikterimen memlekettik sport nysandaryn paıdalaný týraly kelisim jasadyq. Soǵan baılanysty, 12 jasqa deıingi balalar dene shynyqtyrý úıirmelerine tegin bara alady. Mundaı jeńildik kópbalaly otbasylar men múmkindigi shekteýli jandar úshin de qarastyrylǵan», - deıdi basqarma basshysy.
