Qostanaı oblysy egin alqaptarynda shegirtke qaptady

QOSTANAI. QazAqparat - Qostanaı oblysynda sharýalar shegirtkeden orasan zor zııan kórip otyr. Ásirese Jankeldın aýdanyndaǵy alqaptarda shegirtke qaptady. Búginde atalǵan zııankester bir táýlikte alty sharýa qojalyǵyna tıesili 10 myń gektardaı aýmaqty otap ketken. Jergilikti dıqandar osyny aıtyp dabyl qaǵyp otyr, dep habarlaıdy QazAqparat «Qostanaı tańy» basylymyna silteme jasap.

Jer ıeleri tıisti organdar máselege nazar salmasa, kúnkóriske arqaý bolyp otyrǵan eńbeginiń esh ketetetinine qynjylady.

«Shegirtke túskeli jalǵyz agregat keldi, onyń óziniń ýy joq. Ana tusta janarmaıy taýsylyp ushaq ta qańtarylyp tur. Kıikten qorǵanymyz dep júrgende, myna jándigi qurǵyr, jan-jaǵymyzdy tıp-tıpyl etýde», — deıdi jergilikti sharýa Qaırat Raıysov.

Buǵan qarsy qandaı sharalar qolǵa alynǵanyn ókiletti organ aıtyp berdi.

«Jaǵdaıdyń ýshyǵýyna baılanysty oblysymyzdyń 1 625 myń ga aýmaǵyna zertteý júrgizilgen. Onyń 445,174 myń gektaryn eldi mekender alyp jatsa, 266,118 myń gektary shegirtkeden ekonomıkalyq zııan shegýdiń az-aq aldynda. Zııankester eń kóp taralǵan aımaq - Jankeldın aýdany, ol shamamen 241,978 myń ga aýmaqty alyp jatyr. Mamandar onyń 226,043 myń ga óńdelgenin aıtady. Al Amankeldi aýdanynda shegirtkeden zııan shekken 14,275 myń ga osyndaı óńdelgen jer bar. Jankeldın aýdany jaǵynan shegirtkelerdiń Naýyrzym óńiriniń shekaralas aımaqtary men keıbir jergilikti aýyl sharýashylyǵy taýar óndirýshileriniń eginine zııan keltire bastaǵany týraly faktiler de tirkelip jatyr. Qazirgi ýaqytta aldyn alý sharalarynyń der kezinde júrgizilýi sebepti shegirtkelerdiń negizgi bóligi aýyl sharýashylyǵy daqyldarynan qaıtadan Jankeldın aýdanynyń dalalyq aımaǵyna qonys aýdarypty» dep málim etti oblys ákimdiginen.

Shegirtkeniń taralýyn tıisti mekemeler tikeleı qadaǵalap otyr dep sendirdi Qostanaı oblysy ákimdiginiń baspasóz qyzmeti.