Qostanaı oblysy bıylǵy qysta 485 myń tonna kómir jaǵady
Aldaǵy eki aptanyń ishinde Qostanaıǵa jylý berý bastalady. Bıylǵy qysqy jylytý maýsymyna daıyndyq jumystary aıaqtalýǵa taıaý. Tek astyq jınaý naýqanyna baılanysty elektr qurylǵylarynyń jóndeý jumystary ǵana kesheýildep tur. Oblystyq energetıka jáne turǵyn úı-kommýnaldyq sharýashylyq basqarmasynyń basshysy Almat Isenbaevtyń aıtýynsha, óńirdegi 102 jylytý qazandyǵy men 741 avtonomdy jylytý júıesi saqadaı saı.
«20 shaqyrym jylý jáne 115 shaqyrym sý qubyry men káriz jelileri jóndeldi. Qostanaıdaǵy barlyq bilim, densaýlyq saqtaý, áleýmettik nysany men 2643 kóp qabatty turǵyn úıi tolyq ázir. Gıdravlıkalyq synaqtar kezinde jarylǵan jylý qubyrlaryndaǵy aqaýlar qalpyna keltirildi. Tek Qostanaıdyń Altynsarın kóshesindegi jóndeý osy aptanyń sońǵy jumys kúnine deıin aıaqtalady. Daladaǵy aýa temperatýrasy úsh táýlik boıy +10°S kórsetse, jylý beriledi. Al qazirgi ortasha temperatýra +13°S. Sondyqtan jylý jelilerin iske qosa almaımyz», - dedi A.Isenbaev.
Oblys ákimi jylytý maýsymy barlyq aýdan-qalalardyń basshylarynyń nazarynda bolsyn dedi. Qazir óńirde bıylǵy qysqa 485,4 myń tonna kómir jaǵylady dep josparlansa, onyń 443 myń tonnasy ákelindi. Al 63,7 myń tonna kómir halyqqa satylmaq. Arhımed Muhambetov qalǵan tasymaldaý jumystaryn kesheýildetpeýdi tapsyrdy.
«Oblys ortalyǵynan shalǵaı aýdandarǵa kómirdiń ýaqtyly ári jetkilikti mólsherde jetkizilýin nazarda ustańyzdar. Otynnyń sapasyn tekserip, jiti mán berińizder. Taǵy bir másele, turǵyndardyń jylý-energetıkalyq mekemege ótken jyldan qalǵan bereshegi áli bar. Qaryzdy qaıtarý jumystaryn tezdetý kerek», - dedi aımaq basshysy.
Aıta ketý kerek, oblys ortalyǵynda jylýǵa qaryz 394 mln teńgeden asady, bul kórsetkish ótken jylǵyǵa qaraǵanda, 30 mln-ǵa jýyq teńgege artqan. Jitiqara men Lısakovtyń árqaısysynda bereshek 39 mln-nan assa, Áýlıekól aýdany turǵyndary 2,7, al Taran aýdany 3,5 mln teńge qaryz bolyp otyr.
