Qostanaı oblysy aýmaǵyna zymyran qaldyqtary qulady
QOSTANAI. QazAqparat – Qostanaı oblysynyń Jangeldın aýdany aýmaǵyna zymyran qaldyqtary qulady, dep habarlaıdy QazAqparat.
Jangeldın aýdany ákiminiń orynbasary Dinmuhamed Bıdashevtiń sózinshe, zymyran qaldyqtarynan qaýip joq. Bul halyqaralyq OneWeb baǵdarlamasy sheńberinde júzege asyp otyr.
«Zymyran synyqtary aýdan aýmaǵyna 7 aqpan kúni qulady. Bul arnaıy kelisim boıynsha jasalyp otyr. Turǵyndarǵa eskertildi. Hımıkattar nemese suıyqtyqtar jerge tógilgen joq. 10 aqpanda synyqtar ýtılızatsııalaýǵa alyndy», - dedi Dinmuhamed Bıdashev.
Aıta keteıik, byltyr osy máselege qatysty Jangeldın aýdanynda jıyn ótken-di. Memleket sheshimi boıynsha Shóptikól eldi mekeni mańynan Reseıdiń zymyran qaldyqtaryn qulatýǵa jer berildi. Qaldyqtar belgilengen jyldar ishinde 8 ret qulaıdy. Sondaı-aq, aýdan bıýdjetine jyl saıyn 151 mln teńge qarjy aýdarylady. Al qaldyq tastalatyn Aqkól men Qarasý aýyldaryna jedel járdem kólikteri bólinip, aýyzsý tartylady.
