Qostanaı oblysy asyl tuqymdy iri qaranyń sanyn 20 paıyzǵa jetkizýdi kózdeıdi

ASTANA. 19 jeltoqsan. QazAqparat - 2015 jylǵa qaraı Qostanaı oblysy asyl tuqymdy maldyń sanyn 20 paıyzǵa deıin jetkize alady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Qostanaı oblysynyń ákimi Nuraly Sádýaqasov málim etti.

Ákim habarlaǵandaı, sońǵy úsh jyldyń ishinde oblysqa 10 myńnan astam asyl tuqymdy mal jetkizildi. «Máselen, ótken jyly 6,2 myń bas sıyr ákelinse, aǵymdaǵy jylda 2 myńǵa jýyq asyl tuqymdy iri qara shetelden jetkizildi. Et esportyn ulǵaıtýdyń taǵy bir joly - «Sybaǵa» memlekettik baǵdarlamasy. Onyń aıasynda 11 myńnan astam mal satyp alyndy. Al qazirgi kórsetkishter saqtala berse, 2015 jylǵa qaraı oblystyń aýyl sharýashylyǵy ónim óndirýshileri 24 myńnan astam mal basyn ala alady. Sonyń arqasynda asyl tuqymdy iri qaranyń sany 7 paıyzdan 20 paıyzǵa deıin ósedi», - deıdi N.Sádýaqasov.