Qostanaı oblysy Arystaǵy 671 nysandy jóndeıdi
Arystaǵy sońǵy jaǵdaılarǵa baılanysty eldiń túkpir-túkpirinen gýmanıtarlyq kómek jınalyp, arnaıy qor qurylǵany málim.
Qostanaı oblysy da bul bastamadan shet qalmady.
«Oblys ákimi Arhımed Muhambetov Túrkistan oblysynyń ákimi Ómirzaq Shókeevpen baılanysty. Kelissózderdiń nátıjesinde Qostanaı oblysy arystyqtarǵa búlingen úılerdi qalpyna keltirýge kómektesetini belgili boldy. Qazirgi ýaqytta Arys qalasynda Qostanaı oblysy ákiminiń birinshi orynbasary Ǵaýez Nurmuhambetov bastaǵan bir top delegat, memlekettik organdardyń ókilderi jumys istep jatyr»,- dedi oblys ákimdiginiń memlekettik sáýlet-qurylys baqylaý basqarmasynyń basshysy Berik Tańjaryqov.
Onyń sózinshe, qala 17 sektorǵa bólinip, Qostanaı oblysyna №16 sektor bekitilgen. Sektordaǵy nysandardyń sany - 671, onyń ishinde 659 jeke úı, alty áleýmettik nysan, alty temir jol nysany bar.
«Biz 612 úıdi tekserdik. 88 úıge zaqym kelmegen, segiz páter tolyǵymen qırady. Jóndeýge jatatyn 516 úıdiń 158 - i kúrdeli, qalǵan 358-i aǵymdaǵy jóndeýdi qajet etedi. Bizdiń sektordaǵy qalpyna keltirý jumystarynyń barysy Qostanaı oblysynyń ákimi A. Muhambetovtyń jeke baqylaýynda. Men kún saıyn onyń aldynda atqarylǵan jumys týraly esep beremin. Bizdiń oblysqa bekitilgen sektordaǵy qurylys-montaj jumystary úshin jergilikti kompanııalardyń qyzmetkerleri tartyldy»,- dedi Berik Tańjaryqov.
Qazirdiń ózinde 139 nysanda jumys bastalǵan. Onyń beseýi - jańa úılerdiń qurylysy. Kúrdeli jóndeýdi qajet etetin 82 nysanda shatyrdy bólshekteý jáne montajdaý jumystary júrgizilýde. Aǵymdaǵy jóndeý jumystary jetkilikti 50 úıde plastıkalyq terezeler ornatyldy. Kúrdeli jóndeýdi qajet etetin 12 úıdiń jumysy aıaqtaldy. Qalpyna keltirý jumystaryna taǵy 365 úı kezekte tur.
