Qostanaı oblysy álemniń 60 eline taýar eksporttaıdy
Qostanaı oblysy ákiminiń orynbasary Meıirjan Myrzalıevtiń aıtýynsha, óńirdiń 2017 jylǵy syrtqy saýda-sattyǵy 2 mlrd dollardan asyp túsken. Bul aldyńǵy jylmen salystyrǵanda 23,6% artyq.
«Elbasy 2025 jylǵa deıin shıkizattyq emes eksport kólemin eki esege ulǵaıtýdy tapsyrǵany málim. Sondyqtan eksporttaý aımaǵyn keńeıtý mańyzdy bolyp otyr. Qostanaı oblysynyń negizgi shıkizat kózi - agrarlyq sektor men óndiris. Eldiń 24% egis alqaby bizdiń oblysqa tıesili. Buǵan qosa shekemtas pen asbest 100% Qostanaıda óndiriledi. Soǵan qaramastan biz eksport kólemi boıynsha Qazaqstanda 11-oryndamyz», - dedi Myrzalıev óz baıandamasynda.
Myrzalıevtiń málimetine súıensek, oblys eksportynyń 47,6% mıneraldy ónimderden turady. Atap aıtqanda, temir kontsentraty men rýdasy, asbest pen shekemtas ótimdi ónimder sanatyna kiredi. Munan soń azyq-túlik taýarlarynan da paıda túsedi. Bıdaı, zyǵyr tuqymy, kondıterlik taǵamdar Aýǵanstan, Ózbekstan jáne Reseıge eksporttalady.
«Byltyr metall buıymdaryn satýdan 31,8 mln dollar paıda tústi. Olardyń kóbi Reseı, Tájikstan, Qyrǵyzstanǵa ótkizildi. Aýylsharýashylyq qosalqy bólshekteri men qaǵaz ónimderi 10,9 mln dollarǵa satyldy. Jalpy, Qostanaı oblysy álemniń 60 eline taýar tasymaldaıdy», - dedi oblys ákiminiń orynbasary.
Óńir basshysy Arhımed Muhambetov eksporttyq ál-aýqatty damytý úshin kedergilerdi anyqtap alýdy tapsyrdy.
«Oblysta áleýetti degen kásiporyn, zaýyttar jeterlik. Óz ónimderimizdi eksportqa shyǵaryp paıda tabý kerek. Naryq bolǵan soń ózindik qıyndyqtary bolatyny anyq. Solardy jan-jaqty taldańyzdar. Problema bolsa, tıisti organdar kómektesedi. Birigip qımyldasańyzdar nátıjesi de jaqsy bolady. Qostanaılyq ónimderdiń ótimdiligin ulǵaıtý úshin jańa naryqqa shyǵý qajet. Sonyń júıesin ázirleńizder», - dedi A.Muhambetov.
Oblys ákimi kásiporyn basshylaryn syrt elderge taýar ótkizýde kezdesetin kedergilerdi aıtyp, olardy birge sheshýge shaqyrdy.
