Qostanaı oblysy ákimdiginde «Adaldyq dúkeni» ashyldy

QOSTANAI. QazAqparat - Qostanaı oblysy ákimdiginiń ǵımaratynda dúken ashyldy, dep habarlaıdy QazAqparat oblys ákiminiń baspasóz qyzmetine silteme jasap.

Qostanaı oblysynyń ákimdigi «Integrity Shop» (Adaldyq dúkeni) jobasyna qosyldy.

«Atalǵan dúken oblys ákimi ǵımaratynyń 1-qabatyndaǵy ashanada ornalasqan. Sonymen qatar, memlekettik qyzmetshileri arasynda suranysqa ıe bolyp otyr. Dúkenniń alǵashqy kelýshileri oblys ákiminiń qyzmetkerleri boldy», - dep atap ótti oblys ákiminiń baspasóz qyzmetindegiler.

Dúkenniń bar ereksheligi - kez kelgen satyp alýshy eseptegishti paıdalanyp, ózine qajetti taýardy tańdaıdy. Alǵan zatynyń somasyn eseptep, aqshany arnaıy jáshikte qaldyrady.

Mundaı dúkenniń bolýy adamdardy adaldyqqa baýlıdy deıdi uıymdastyrýshylar. Aldaǵy ýaqytta ákimdik qyzmetkerleri «Adaldyq dúkeni» taýarlar jelisin keńeıtý jáne POS-termınaldar ornatýdy josparlaýda.