Qostanaı oblystyq spartakıadasyna 27 myń adam qatysty
QOSTANAI. QazAqparat - Lısakov qalasynda ótken «Tyń Tselına-2018» 33-shi oblystyq spartakıadasyna bıyl 27 myńnan astam adam qatysty, dep habarlaıdy QazAqparat tilshisi.
Qala turǵyndary men qonaqtaryn Qostanaı oblysy ákiminiń atynan onyń birinshi orynbasary Ǵaýez Nurmuhambetov quttyqtady. Onyń aıtýynsha, spartakıada - Elbasy Nursultan Nazarbaevtyń buqaralyq sportty damytý jónindegi tapsyrmasynyń oryndalýyn aıǵaqtaıtyn jarqyn úlgi.
«Oblysta buqaralyq sportpen 260 myń adam qamtylǵan, bul - Qostanaı óńiri halqynyń 29 paıyzy. Eger ótken jyly spartakıada qatysýshylarynyń sany 26 myń bolsa, bıyl bul is-sharaǵa aýyl, aýdan jáne qalalardan 27 myń atlet baq synady. Spartakıada buqaralyq sportty damytýǵa yntalandyrady»,-dep atap ótti obyls ákiminiń birinshi orynbasary.
Máselen, ótken jyly Qostanaıdaǵy «Ortalyq» stadıony rekonstrýktsııalanyp, oryndar sany 5800-den 10 myńǵa deıin kóbeıdi. Memlekettik-jekemenshik áriptestik sheńberinde Qostanaıda 1000 oryndyq sport kesheniniń qurylysy aıaqtaldy. Odan bólek, ÝEFA standarttaryna saı keletin 3000 orynǵa arnalǵan fýtbol maneji salynyp jatyr. Sonymen qatar, 50 metrlik basseınniń qurylysy bastaldy. 2500 adamǵa arnalǵan muz jabyny bar muz saraıyn turǵyzý jóninde kelisim jasalǵan.
«Bul is-sharalardyń barlyǵy sportpen aınalysatyn halyq sanyn 3 myń adamǵa arttyrýǵa múmkindik beredi. Aýdandar da qalyspaıdy. Qostanaı aýdanyndaǵy «Zatobol» stadıony jóndeýden ótedi. Arqalyqta tartylǵan ınvestıtsııalar arqasynda «Jiger» stadıony kúrdeli jóndeýden ótti. Ózderińiz kórip otyrsyzdar, Lısakovtaǵy 2000 orynǵa arnalǵan stadıon da jańartyldy»,-dedi Ǵaýez Nurmuhambetov.
Spartakıadada basketbol, voleıbol, fýtbol, erkin kúres, áıelder kúresi, dzıýdo, qazaq kúresi, jeńil atletıka, toǵyzqumalaq, gir kóterý, shahmat jáne basqa da sport túrlerinen jarystar ótti. Jarys nátıjesinde komandalyq esepte birinshi oryndy Qostanaı qalasy ıemdense, ekinshi oryndy - Rýdnyı jeńip aldy. Úshinshi oryn Lısakov qalasyna buıyrdy.
