Qostanaı oblystyq bıýdjetiniń kiris bóligi 1 mlrd 795 mln teńgege kemidi

QOSTANAI. QazAqparat - Qostanaı oblysy bıýdjetiniń kiris bóligi 2017 jyly edáýir kemigen. Bul týraly oblystyq máslıhattyń kezekten tys sessııasynda ekonomıka jáne bıýdjettik josparlaý basqarmasynyń basshysy Erlan Spanov málimdedi, dep habarlaıdy QazAqparat tilshisi.

Memlekettik satyp alýdy ótkizý nátıjeleri boıynsha 2 mlrd 23 mln teńge oblystyq bıýdjetke qaıtaryldy. 

«Bul qarajattyń biraz bóligi ár túrli qajettilikterge jumsaý úshin kelesi jylǵa aýysady. Atap aıtqanda, 704 mln teńge Arqalyq jylý-energetıkalyq kompanııasyna otyn mazýtyn satyp alý úshin, 383 mln teńge ıÝbıleınyı yqshamaýdanyna elektr jelilerin jetkizýge, taǵy 100 mln teńge Uzynkól aýdanyndaǵy mádenıet úıi ǵımaratyn kúrdeli jóndeýden ótkizýge jumsalady», - dedi Spanov.

Tutastaı alǵanda, 2017 jylǵy oblystyq bıýdjettiń kiris bóligi 1 mlrd 795 mln teńgege tómendedi. Bul qarajat qaldyq retinde 2018 jylǵy bıýdjetke kóshiriledi.

Jıyn barysynda oblystyq Qoǵamdyq keńestiń múshesi Sergeı Jalybın  qaladaǵy Altynsarın-Lermontov kósheleriniń qıylysynda turǵan eki ǵımarattyń qurylysy jóninde surady.

 «Kelesi jylǵy bıýdjetti naqtylaý kezinde ıesiz turǵan osy ǵımarattardy birjaqty etý kerek. Bulardy paıdalanýǵa bolatyn ǵımarattar tizimine engizý týraly usynys aıtqym keledi. Menińshe, atalǵan qurylys nysandaryn memlekettik- jekeshelik áriptestik sheńberinde qoldanýǵa bolady», - deıd Jalybın.

Qoǵamdyq keńestiń usynysyn oblys ákimi Arhımed Muhambetov te qoldady. Óńir basshysy ekonomıka jáne bıýdjettik josparlaý basqarmasyna bul máseleni birjaqty etýdi tapsyrdy.