Qostanaı oblystyq Tótenshe jaǵdaılar departamentine jańa basshy taǵaıyndaldy
QOSTANAI. KAZINFORM – Qostanaı oblysy tótenshe jaǵdaılar departamentinde kadrlyq ózgerister boldy. Departament basshysynyń mindetin ýaqytsha atqarýshy bolyp azamattyq qorǵaý polkovnıgi Nazaralı Selimov taǵaıyndaldy.
Nazaralı Ǵadjymagomeduly 1985 jylǵy 14 mamyrda Reseı Federatsııasynda dúnıege kelgen. 2007 jyly Kókshetaý tehnıkalyq ınstıtýtyn «Órt qaýipsizdigi» mamandyǵy boıynsha aıaqtap, azamattyq qorǵaý organdarynda qyzmetin bastaǵan.
Batys Qazaqstan oblysynyń TJ departamentinde órt sóndirý jáne avarııalyq-qutqarý jumystary qyzmetin basqarǵan.
Keıin Mańǵystaý oblysy men elordadaǵy departamentterde qyzmet atqardy.
2024 jyldyń mamyr aıynan bastap Atyraý oblysy TJD bastyǵynyń birinshi orynbasary laýazymynda boldy.
Jańa basshyny departament ujymyna QR Tótenshe jaǵdaılar mınıstrligi apparatynyń jetekshisi Dáýren Esimseıitov tanystyrdy.
Aıta keteıik, buǵan deıin Qostanaı oblysy TJ departamentin basqarǵan Damır Ermaǵanbetov Almaty qalasy TJD basshysy qyzmetine taǵaıyndalǵan bolatyn.