Qostanaı oblysynyń jylý jelilerin rekonstrýktsııalaýǵa 2,2 mlrd teńge bólindi
ASTANA. KAZINFORM – Memleket basshysynyń tapsyrmalaryn júzege asyrý sheńberinde óńirlerde halyqty úzdiksiz jylý jáne sýmen qamtamasyz etý úshin energetıkalyq jáne kommýnaldyq sektorlardy jańǵyrtý boıynsha jumys jalǵasyp jatyr. Bul týraly Úkimettiń baspasóz qyzmeti habarlady.
Qostanaı oblysyndaǵy jylý jelilerin rekonstrýktsııalaýdy aıaqtaýǵa Úkimet rezervinen shamamen 2,2 mlrd teńge bólindi.
Tıisti Qaýlyǵa Premer-mınıstr Oljas Bektenov qol qoıdy.
Qarajat Qostanaı, Jitiqara, Arqalyq qalalaryn jylýmen jabdyqtaý jáne Rýdnyıdy sýmen jabdyqtaý nysandaryn jóndeýge baǵyttaldy. Qostanaı qalasynyń JEO bas bý qubyryn rekonstrýktsııalaýǵa 188 mln teńge baǵyttaldy.
Bul nysan 1955 jyly paıdalanýǵa berilgen. Bý qubyryna sońǵy ishinara jóndeý 2012 jyly júrgizilgen. Jańǵyrtý qysqy kezeńde JEO jumysynyń senimdiligin arttyrýǵa múmkindik beredi. Jitiqara qalasynda 11 shaǵyn aýdanda jylý jelilerin jóndeýge 389 mln teńge bólindi, onyń 269 mln teńgesi Y.Altynsarın kóshesi jáne 205 mln-y Jibek Joly kóshesi boıynsha.
Bul jylý jelileri 183 kóppáterli úı, 2,5 myń az qabatty úımen qatar, qala qurylysynyń edáýir massıvterin qamtıdy. Jylý energııasyn tutynýshylardyń jalpy sany 15,5 myń abonentti quraıdy. Jalpy, qalanyń jylý jelileriniń uzyndyǵy 78 shaqyrym, onyń ishinde magıstraldyq jelileri – 7,53 shaqyrym. Sondaı-aq jumystar Arqalyq qalasynda da júrgizilýde, onda jylý jelilerin rekonstrýktsııalaý boıynsha jobanyń úshinshi kezegin júzege asyrýǵa shamamen 645 mln teńge baǵyttaldy.
2025 jylǵa esepteýlerge sáıkes jalpy uzyndyǵy 10 shaqyrym bolatyn 1,6 shaqyrym jelini jańartý josparlanýda. Bul jelige jalpy bilim beretin mekteppen qatar 300 abonent qosylǵan. Rýdnyı qalasynyń sýmen jabdyqtaý júıesin rekonstrýktsııalaý jobasy 500 mln teńgege qarjylandyryldy. Atap aıtqanda, qarajat 1978 jyly paıdalanýǵa berilgen qalanyń №2 súzgi stansasyn jańǵyrtýǵa jumsalady.
Joba Rýdnyı qalasyn, Qashar jáne Gornıak kentterin, sondaı-aq ónerkásiptik nysandardy — barlyǵy 122 myńnan astam adamdy úzdiksiz jáne sapaly sýmen jabdyqtaýdy, sondaı-aq jylytý maýsymynyń apatsyz ótýin qamtamasyz etedi.
Úkimet qabyldaǵan jańǵyrtý sharalary óńirdegi ınjenerlik ınfraqurylymdy edáýir nyǵaıtýǵa, jylý jáne sýmen jabdyqtaý nysandarynyń senimdiligi men tıimdiligin arttyrýǵa, shyǵyndardy azaıtýǵa, turǵyndar men áleýmettik mańyzy bar nysandardy jylýmen jáne sýmen qamtamasyz etýge múmkindik beredi.
Aıta keteıik, Almatyda jylý jelilerin onlaın baqylaıtyn «aqyldy» júıe engizildi.