Qostanaı oblysynyń turǵyny ıtke pyshaq suǵyp, azaptaǵan

ASTANA. KAZINFORM — Qostanaı oblysynda polıtsııa ıtke pyshaq suqqan er adamdy ustady. Bul týraly Polisia.kz saıty habarlaıdy.

Rýdnyıda áıel adam ıttiń pyshaq jaraqatyn alǵanyna kýá boldy. Ol janýardy qorǵaý úshin dereý polıtsııa shaqyrǵan.

— Polıtsııa 41 jastaǵy kúdiktini ustady. Atalǵan oqıǵa boıynsha sotqa deıingi tergeý amaldary bastalyp, mán-jaılar anyqtalyp jatyr, — delingen habarlamada.

Aıta keteıik, janýarlarǵa qatygezdikpen qaraý qylmystyq jaýapkershilikke alyp keledi. Ol úshin 200 AEK-ke deıin aıyppul (738 myń teńge), túzetý nemese qoǵamdyq jumystar (200 saǵatqa deıin) taǵaıyndalýy múmkin, al keı jaǵdaılarda 50 táýlikke deıin qamaýǵa alý jazasy kózdelgen.

Sondaı-aq, elimizde «Janýarlarǵa jaýapkershilikpen qaraý týraly» Zańǵa túzetýler ázirlengeni belgili boldy.

Buǵan deıin habarlaǵanymyzdaı, Keler jyldan Ózbekstandaǵy tsırkterde jabaıy janýarlardy paıdalanýǵa tyıym salynady.