Qostanaı oblysynyń turǵyndaryn shildede aptap ystyq kútip tur
ASTANA. KAZINFORM – Shilde aıynda Qostanaı oblysynda aptap ystyq, naızaǵaıly jańbyrly kúnder men shańdy daýyldar kútilip otyr, dep habarlaıdy Kazinform tilshisi.
Sınoptıkterdiń boljamynsha, aılyq ortasha aýa temperatýrasy +19,7...+24,2 gradýs aralyǵynda bolyp, klımattyq normaǵa jýyq bolady.
Shildeniń birinshi onkúndiginde túngi temperatýra +8...+13 gradýstan +13...+18 gradýsqa deıin, al kúndiz +20...+25 gradýstan +29...+34 gradýsqa deıin kóteriledi. Onkúndiktiń sońyna qaraı kúnniń jylynýy kútiledi.
Ekinshi onkúndikte aptap ystyq kúsheıedi. Túnde aýa temperatýrasy keı jerlerde +20...+25 gradýsqa deıin jetse, kúndiz +32...+37 gradýsqa deıingi qatty ystyq boljanyp otyr. Keıin temperatýra aýytqyp turady: túnde +14...+19 gradýstan +20...+25 gradýsqa deıin, kúndiz +26...+31 gradýstan +32...+37 gradýsqa deıin bolady.
Aıdyń úshinshi onkúndiginde aýa temperatýrasy sál tómendeıdi. Túnde +15...+20 gradýs, kúndiz +25...+30 gradýs shamasynda bolady. Alaıda keıinnen ystyq qaıta kúsheıip, kúndiz aýa temperatýrasy +30...+35 gradýsqa deıin jetýi múmkin.
Jaýyn-shashyn mólsheri oblystyń basym bóliginde klımattyq normadan joǵary bolady dep kútilip otyr. Óńirdiń ońtústiginde bul kórsetkish normaǵa jýyq bolady. Qysqa merzimdi jańbyr men naızaǵaı birinshi onkúndikte, ekinshi onkúndiktiń basy men sońynda, sondaı-aq úshinshi onkúndiktiń ortasy men sońynda boljanyp otyr.
Sonymen qatar aı boıy jeldiń kúsheıýi kútiledi. Jel ekpini sekýndyna 15–20 metrge deıin jetýi múmkin. Shańdy daýyldar birinshi onkúndiktiń basynda, sondaı-aq ekinshi onkúndiktiń basy men sońynda bolýy yqtımal.
Buǵan deıin mamandar Qazaqstandaǵy klımattyń barǵan saıyn qubylmaly sıpat alyp bara jatqanyn aıtyp, bıylǵy jazdyń erekshelikteri týraly boljam jasaǵan edi.
Sondaı-aq klımat ózgerisi kúsheıip, 2026 jyldyń mamyry tarıhı kórsetkishke jetkenin jazdyq.
