Qostanaı oblysynyń gaz quıý stansalarynda uzyn-sonar kezek paıda boldy
QOSTANAI. KAZINFORM — Bul jaǵdaı biraz ýaqyttan beri saqtalyp keledi. Oblystyq energetıka jáne turǵyn úı-kommýnaldyq sharýashylyq basqarmasy rastaǵandaı, qazirgi tańda gaz tek talon boıynsha beriledi — óńirde shamamen 90 tonna gaz qory qalǵan.
5 qarashadaǵy jaǵdaı boıynsha, oblysta gaz satýmen aınalysatyn alty gaz jelilik uıym men jeti jeke kásipker jumys isteıdi. Qarasha aıyna Qostanaı oblysyna kelesi kólemde gaz bólingen:
-
2736 tonna — «JaıyqMunaı» JShS;
-
2268 tonna — «SNPS-Aqtóbemunaıgaz» AQ;
-
288 tonna — «PetroQazaqstan Oıl Prodakts» JShS.
Alaıda jetkizýshi zaýyttardaǵy jóndeý jumystaryna baılanysty óńirge gaz jetkizý kólemi qysqarǵan: qyrkúıekte — «JaıyqMunaı» JShS-de, al qazanda — «SNPS-Aqtóbemunaıgaz» AQ-de jóndeý júrgizilgen.
Sonyń saldarynan óńir qyrkúıekte 2248 tonna, al qazanda 1188 tonna gazdy ala almaǵan.
Energetıka basqarmasynyń Energetıka mınıstrligine júginýinen keıin tapshylyqtyń bir bóligi óteldi — Pavlodar munaı-hımııa zaýytynan qosymsha 1548 tonna bólindi. Alaıda naryqtaǵy resýrstardyń jetispeýshiligine baılanysty qyrkúıektegi 900 tonna jáne qazandaǵy 1188 tonna kólem áli de jabylmaǵan.
Búgingi tańda óńirge 468 tonna (13 vagon) gaz jóneltildi, onyń ishinde:
-
360 tonna — «JaıyqMunaı» JShS;
-
108 tonna — «SNPS-Aqtóbemunaıgaz» AQ.
Oblys ákimdigi jaǵdaıdyń baqylaýda ekenin jáne qalǵan kólemder belgilengen merzimde jetkiziletinin málimdedi.
Aıta keteıik, buǵan deıin gaz tapshylyǵy Túrkistan oblysynda da tirkelgen bolatyn. Sondaı-aq qazan aıynda Aqtóbe oblysynda da osyndaı jaǵdaı baıqaldy.
SQO-da da suıytylǵan gaz talonmen satylyp jatqany habarlandy.