Qostanaı oblysyndaǵy tasjoldar mobıldi ınternetpen qamtylady

QOSTANAI. KAZINFORM – Qostanaı oblysynda respýblıkalyq jáne oblystyq mańyzy bar avtojoldar boıynda mobıldi ınternet iske qosylady.

Jobany ınvestor tartý arqyly júzege asyrý josparlanyp otyr. Osyǵan baılanysty QR Úkimeti men Transtelekom kompanııasy arasynda ınvestıtsııalyq kelisimge qol qoıyldy.

Qujatqa sáıkes, elimizdegi respýblıkalyq jáne oblystyq avtomobıl joldaryn radıodabylmen qamtý jáne telekommýnıkatsııalyq ınfraqurylym salý jónindegi ınvestıtsııalyq joba iske asyrylady. Joba aıasynda Qostanaı oblysynda respýblıkalyq trassalar boıynda antenna-dińgek qurylystaryn salýǵa arnalǵan jeti núkte aıqyndalǵan.

Atap aıtqanda:

– Arqalyq qalasynda – 1 núkte;
– Jitiqara aýdanynda – 1;
– Altynsarın aýdanynda – 2;
– Sarykól aýdanynda – 1;
– Denısov aýdanynda 2 núktede ornalastyrý josparlanǵan.

Barlyq atalǵan nysandar boıynsha jobalyq-smetalyq qujattamaǵa oń saraptama qorytyndysy alynǵan. Sonymen qatar olar jekeshelendirý tizimine engizilip, baǵalaý jumystary júrgizilgen.

Aıta keteıik, buǵan deıin Qostanaı oblysyndaǵy aqyly joldarda jyldamdyqty avtomatty tirkeý engiziletini habarlanǵan bolatyn.