Qostanaı oblysyndaǵy mektepte quny 50 mln teńgeden asatyn satyp alý zańsyz júrgizilgen

ASTANA. KAZINFORM – Qarabalyq aýdanynyń prokýratýrasy bilim bóliminde bıýdjet qarajatyn jymqyrý jáne memlekettik satyp alý zańnamasyn buzý faktilerin anyqtady. Tekserý qorytyndysy boıynsha bólim basshysy qyzmetinen bosatylyp, jeti laýazymdy tulǵa tártiptik jaýaptylyqqa tartyldy.

zań
Foto: freepik.com

Prokýratýra tekserý barysynda jaýapty laýazymdy tulǵanyń 768 myń teńgeni kiriske almaǵanyn anyqtady. Sondaı-aq quny 8,7 mln teńge bolatyn mektep jabdyqtary men olardy satyp alýǵa bólingen 744 myń teńge qarajattyń joqtyǵy belgili boldy.

Osy derek boıynsha Qylmystyq kodekstiń 189-baby 2-bóliginiń 3) tarmaǵymen sotqa deıingi tergep-tekserý bastaldy. Keıin keltirilgen zalal tolyq ótelip, qylmystyq is raqymshylyq jasaý aktisi negizinde toqtatyldy.

Budan bólek, jalpy somasy 50 mln teńgeden asatyn taýarlar konkýrstyq rásimder ótkizilmeı satyp alynǵan. Bul rette jabdyqtardyń belgilengen talaptarǵa sáıkestigin rastaıtyn qujattar men kepildik mindettemeleri bolmaǵan.

Prokýrorlyq qadaǵalaý sharalarynyń nátıjesinde bilim bóliminiń basshysy laýazymynan bosatyldy. Taǵy jeti laýazymdy tulǵa tártiptik jaýaptylyqqa tartyldy.

Bıýdjet qarajatynyń zańdy jumsalýyn jáne memlekettik satyp alý salasyndaǵy zańdylyqtyń saqtalýyn qamtamasyz etý jumystary jalǵasyp jatyr.

Osyǵan deıin Qostanaı oblysynda mektep oqýshylarynyń jeke derekteri ashyq jarııalanǵany týraly jazdyq.