Qostanaı oblysyndaǵy máslıhat saılaýyna 800-den astam kandıdat qatysady
ASTANA. KAZINFORM — Qostanaı oblysynda barlyq deńgeıdegi máslıhat depýtattaryn saılaýǵa kandıdattardy tirkeý aıaqtaldy. 264 depýtattyq mandatqa 807 kandıdat úmitker bolyp otyr. Bul týraly oblystyq saılaý komıssııasy málim etti, dep habarlaıdy Kazinform agenttiginiń tilshisi.
Óńir aýmaǵynda 716 saılaý ýchaskesi quryldy. Barlyǵy 264 máslıhat depýtaty saılanýy tıis. Onyń ishinde 32 depýtat Qostanaı oblystyq máslıhatyna ótedi. Olardyń 16-sy partııalyq tizim boıynsha, taǵy 16-sy birmandatty saılaý okrýgteri arqyly saılanady.
Al aýdandyq jáne qalalyq máslıhattarǵa birmandatty okrýgter boıynsha 232 depýtat saılanady.
Kúntizbelik josparǵa sáıkes, kandıdattardy tirkeý 1 qarasha kúni saǵat 18:00–de aıaqtaldy.
Partııalyq tizimder boıynsha saılaýǵa bes saıası partııa qatysýǵa jiberildi. Barlyǵy 62 kandıdat tirkelgen:
-
Qazaqstannyń «Aq jol» demokratııalyq partııasy — 10 adam;
-
«Respublica» partııasy — 6 adam;
-
Qazaqstan Halyq partııasy — 5 adam;
-
«Aýyl» partııasy — 8 adam;
-
«Ádilet» partııasy — 33 adam.
248 birmandatty saılaý okrýgi boıynsha bastapqyda 749 kandıdat usynylǵan. Olardyń bireýin tirkeýden bas tartylsa, taǵy úsheýi óz ótinishimen kandıdatýrasyn alyp tastaǵan.
Osylaısha, birmandatty okrýgter boıynsha 745 kandıdat tirkeldi. Onyń 248-i saıası partııalar atynan usynylsa, 497-si ózin-ózi usyný tártibimen saılaýǵa qatysady.
Jalpy, Qostanaı oblysy máslıhattarynyń depýtattyǵyna partııalyq tizimdegilerdi qosa alǵanda, 807 kandıdat tirkeldi.
Eske salaıyq, osyǵan deıin Pavlodar oblysynda máslıhat depýtattyǵyna 529 kandıdat tirkelgenin jazǵan edik.
Sondaı-aq, máslıhat saılaýyn ótkizýge qansha qarajat bólinetini belgili boldy.
