Qostanaı oblysyndaǵy Máskeý aýylynda tótenshe jaǵdaı jarııalandy
Aýyz sý qubyryn tartý jumysy keshikken Qostanaı oblysy Qostanaı aýdanyna qarasty Máskeý aýylynda tehnogendik sıpattaǵy tótenshe jaǵdaı jarııalandy, dep habarlaıdy Kazinform.
«Qostanaı oblysy Qostanaı aýdany Máskeý aýylynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalansyn. Tótenshe jaǵdaıdy joıýǵa baǵyttalǵan is-sharalar júrgizilsin», - delingen tótenshe jaǵdaıdyń aldyn alý jónindegi komıssııanyń sheshiminde.
Munyń mán-jaıyn anyqtaý maqsatynda ákimdiktiń baspasóz qyzmetine habarlastyq. Tıisinshe, Kazinform tilshisiniń saýalyna aýdan basshysy Berik Tańjaryqov jaýap berdi.
«3 jyl boıy Máskeý aýylyn aýyz sýmen qamtamasyz etý boıynsha qurylys-montajdaý jumysy júrip jatyr. Buǵan Shyǵys Qazaqstan oblysynyń kompanııasy jaýapty bolǵan. Bıyl 4 aıdan beri sý qubyryn tartý toqtap tur. Sáıkesinshe, turǵyndar ony tez arada iske qosýdy talap etip, aryz joldaýda. Biz eski merdigermen aradaǵy kelisimshartty buzdyq, óıtkeni onda qarjylyq qıyndyqtar týyndady. Al qazir konkýrs ótkizip, onyń ornyna jańa merdigerdi bekitsek, onda bul keler jylǵa deıin sozylyp ketedi. Osyǵan baılanysty biz tótenshe jaǵdaıdyń aldyn alý jónindegi komıssııanyń otyrysyn uıymdastyryp, tehnogendik sıpattaǵy tótenshe jaǵdaı jarııalaý sheshimin qabyldadyq. Onyń maqsaty - Máskeý aýylyn aýyz sýmen qamtý», - dedi Qostanaı aýdanynyń ákimi Berik Tańjaryqov Kazinform tilshisiniń saýalyna jaýap bere otyryp.
Onyń sózinshe, qubyrdy tartý jumysy jyl sońyna deıin aıaqtalady.
Qosa keteıik, Máskeý aýyldyq okrýginde 1 500 turǵyn bar.
