Qostanaı oblysyndaǵy kolonııada jańa jyldyq shyrsha óndiretin kásiporyn ashylady

ASTANA. KAZINFORM — Qostanaı oblysy boıynsha Qylmystyq-atqarý júıesi departamentine qarasty №38 mekemede eki jańa óndiristik angar ashyldy. Olardyń jumysyn uıymdastyrý nátıjesinde 150 sottalǵan azamatty jumyspen qamtý josparlanyp otyr. Bul týraly Kazinform agenttiginiń óńirdegi tilshisi habarlady.

Qostanaı oblysyndaǵy kolonııada jańa jyldyq shyrsha óndiretin kásiporyn ashylady
Foto: Qostanaı oblysynyń Qylmystyq-atqarý júıesi departamenti

Óńirlik Qylmystyq-atqarý júıesi departamentiniń baspasóz qyzmetiniń málimetinshe, mekeme aýmaǵynda jalpy aýdany 1 020 sharshy metr bolatyn eki jyldam qurastyrylatyn modýldik angar paıdalanýǵa berildi. Nysandardyń qurylysyna oblystyq bıýdjetten 100 mıllıon teńge bólingen.

Jańa óndiristik ǵımarattarda eki kásiporyn jumysyn bastaıdy. Atap aıtqanda, «Azýrıt» JShS tigin tsehyn ashyp, onda 100 sottalǵan azamatty jumyspen qamtýdy josparlap otyr. Al «Chechýlına» JShS kásipornynda jańa jyldyq shyrsha óndiretin tseh iske qosylyp, taǵy 50 adam jumysqa ornalasady.

Osylaısha, jańa óndiristik alańdardyń ashylýy sottalǵan azamattarǵa arnalǵan 150 jumys ornyn qurýǵa múmkindik beredi.

Qazirgi ýaqytta №38 mekemeniń aýmaǵynda 28 kásipkerlik sýbektisi óz qyzmetin júzege asyryp keledi.

Aıta keteıik, buǵan deıin Qaraǵandyda 180 sottalǵan kásip meńgerýdi bastaǵan edi.