Qostanaı oblysyndaǵy kolledjde bolǵan órt saldarynan er adam qaza tapty
QOSTANAI. KAZINFORM — Qostanaı oblysynda aýyldyq kolledjdiń zerthanalyq korpýsynda shyqqan órt saldarynan 1968 jyly týǵan er adam qaza tapty, dep habarlaıdy Kazinform tilshisi.
Oblystyq Tótenshe jaǵdaılar departamentiniń málimetinshe, 21 aqpanda 112 qyzmetine Fedorov aýdanyna qarasty Jarkol aýylyndaǵy kolledj aýmaǵynda tútin baıqalǵany týraly habarlama túsken.
Oqıǵa ornyna jedel túrde órt sóndirý bólimsheleri jiberilip, eki qabatty zerthanalyq korpýs ǵımaratynyń birinshi qabatyndaǵy qosalqy bólmede órt shyqqany anyqtaldy.
Qutqarý jumystary kezinde 1968 jyly týǵan er adam es-tússiz kúıde tabylyp, taza aýaǵa shyǵarylyp, jedel járdem brıgadasyna tapsyryldy. Alaıda dárigerlerdiń qolǵa alǵan barlyq reanımatsııalyq sharalaryna qaramastan, ony aman alyp qalý múmkin bolmady. Qazirgi ýaqytta sot-medıtsınalyq saraptama taǵaıyndaldy.
Órt tolyqtaı sóndirildi. Quzyrly organdar órttiń shyǵý sebepterin anyqtaý úshin órt-tehnıkalyq zertteý júrgizip jatyr.
Aıta keteıik, buǵan deıin Astanada eki qabatty ǵımarat órtenip, tilsiz jaý der kezinde sóndirildi.