Qostanaı oblysyndaǵy qaýipti jol ýchaskelerinde kólikten ozýǵa tyıym salynady
ASTANA. KAZINFORM – Qostanaı oblysynda 2026–2028 jyldarǵa arnalǵan jol-kólik jaraqatyn azaıtý jónindegi jol kartasy aıasynda jol qozǵalysy qaýipsizdigin arttyrýǵa baǵyttalǵan birqatar shara júzege asyrylady, dep habarlaıdy Kazinform tilshisi.
Óńirlik kommýnıkatsııalar qyzmetinde ótken brıfıngte málim etilgendeı, respýblıkalyq mańyzy bar apat qaýpi joǵary jol ýchaskelerinde 3.20 («Basyp ozýǵa tyıym salynady») jol belgileri ornatylady. Olar myna baǵyttarda qoıylady:
– «Qostanaı – Áýlıekól – Surǵan»;
– «Astana – Atbasar – Jaqsy – Rýzaevka – Sarykól – Qostanaı (aınalma jol arqyly) – Reseı Federatsııasynyń shekarasy («Qaıraq» ótkizý pýnkti)»;
– «Qostanaı – Mamlıýtka»;
– «Qarabutaq – Denısovka – Qostanaı».
Polıtsııanyń málimetinshe, jańa jol belgilerin ornatýmen qatar óńirde jol ınfraqurylymynyń qaýipsizdigin arttyrýǵa baǵyttalǵan basqa da jumystar júrgiziledi.
Atap aıtqanda, oblystyq mańyzy bar avtomobıl joldarynyń 75,4 shaqyrymyna jáne aýdandyq joldardyń 12 ýchaskesine ortasha jóndeý júrgiziledi.
Sondaı-aq «Rýdnyı – Qashar – Fedorovka» (51–53 km) jáne «Uzynkól – Sarykól» (2–12,6 km) oblystyq joldarynyń eki ýchaskesi qaıta jańǵyrtylady.
Budan bólek, respýblıkalyq mańyzy bar avtojoldardyń 270,9 shaqyrymyna ortasha jóndeý júrgizilip, uzyndyǵy 16,9 shaqyrym bolatyn Rýdnyı qalasyn aınalyp ótetin jol eki kópirmen jáne jolaıryqpen birge salynady.
Sonymen qatar «Ortalyq – Batys» respýblıkalyq avtojolynyń (Astana – Janteke – Egindikól – Arqalyq – Torǵaı – Yrǵyz) qurylysy jalǵasady. Onyń 401 shaqyrymy Qostanaı oblysynyń aýmaǵy arqyly ótedi.
Buǵan deıin Aqmola men SQO-da jol qurylysy mamandary paramen ustalǵanyn jazdyq.
