Qostanaı oblysyndaǵy Qaratomar sý qoımasy 99% toldy

ASTANA. KAZINFORM – Qostanaı oblysy ákiminiń orynbasary Arman Ábenov óńirdiń sý tasqynymen qalaı kúresip jatqanyn aıtyp berdi.

Sheneýniktiń aıtýynsha, oblystyń ońtústigindegi sý tasqyny jaǵdaıy turaqtaldy. Kúsh Qostanaı oblysynyń basqa aýdandaryna baǵyttaldy. Qazir Qaratomar sý qoımasy qarqyndy tolyp jatyr (99%). Sondaı-aq, Qostanaıǵa qaraı qýaty sekýndyna 2 640 tekshe metr sý aǵyp jatyr.

Qostanaıdaǵy Tobyl ózenine, Rýdnyı qalasy Pertsev aýylyna jáne Qostanaı aýdany Tobyl qalasyna irgeles aýmaqtardy sý basý qaýpi bar. Tobyl ózeninde muz keptelisiniń aldyn alý úshin eki ret jarylys jumysy júrgizildi. Sondaı-aq, ákimniń orynbasary Reseıden sý aǵyzý kezinde Áıet aýdan ortalyǵy men taǵy birneshe aýyldy sý basýy múmkin ekenin atap ótti.

Jalpy oblys boıynsha Tobyl men Timtýir ózeniniń boıynda 1 835 adam evakýatsııalandy (táýligine Qostanaı qalasy – 227, Qostanaı aýdany – 1043, Rýdnyı qalasy – 73, Qarasý aýdany – 284, Qarabalyq aýdany – 25, Áýlıekól aýdany – 32, B.Maılın aýdany – 63, Denısov aýdany – 88). Jaǵdaıdy baqylaý úshin táýlik boıy kezekshilik júzege asyrylady.

Aıta ketsek, búgin Memleket basshysy eldegi sý tasqyny saldarynan qalyptasqan aýyr jaǵdaıǵa baılanysty úndeý joldady.